पोखरा, १० माघ –
राष्ट्रिय बाणिज्य बैङ्क लिमिटेडको ५१ औं बार्षिकोत्सव कार्यक्रम देशैभरका शाखाहरुमा विविध कार्यक्रमका साथ मनाइएको छ । बैङ्कको क्षेत्रीय कार्यालय पोखरा, पोखराका अमरसिंहचोक, पृथ्वीचोक, महेन्द्रपुल र पार्दी तथा लेखनाथको तालचोक कार्यालयले पोखरा वृद्धाश्रममा नगद हस्तान्तरणको साथै चियापान गरी संयुक्त रुपमा मनाएका छन् ।
आइतबार आयोजित एक कार्यक्रमका वीच राष्ट्रिय बाणिज्य बैङ्क लिमिटेडका पश्चिमाञ्चल क्षेत्रीय प्रबन्धक गणेशकुमार ढकालले पोखरा वृद्धाश्रमका अध्यक्ष बसन्तकेशव पराजुलीलाई रु ५० हजार बराबरको चेक हस्तान्तरण गर्नुभयो । सो अवसरमा बोल्दै प्रबन्धक ढकालले आगामि दिनमा सामाजिक दायित्व अन्तर्गत यस्तै पुनित कार्यमा सहयोग गर्ने बताउनुभयो ।
साथै वहाँले वृद्धाश्रममा रहेका ज्येष्ठ नागरिकहरुको सामाजिक सुरक्षा भत्ता वितरणका लागि सहज व्यवस्था मिलाउने प्रतिबद्धता समेत व्यक्त गर्नुभयो । बैङ्कका उपप्रमुख राजकुमार खड्काले बैङ्कको बार्षिकोत्सव मनाउने सन्दर्भमा खाजा खर्च बापत प्राप्त रकमलाई सामाजिक कार्यमा लगाउन पाउँदा खुशी लागेको उल्लेख गर्नुभयो । पोखरा वृद्धाश्रमका अध्यक्ष बसन्तकेशव पराजुलीले बाणिज्य बैंकका तर्फबाट पहिलोपटक सहयोग प्राप्त भएको भन्दै यसले अन्य बैंकहरुलाई पनि सहयोगका लागि प्रेरित गर्ने विश्वास व्यक्त गर्नुभयो । बैंकका क्षेत्रीय उपप्रमुख राजेन्द्रकुमार कट्टेलले स्वागत गर्नुभएको कार्यक्रमको संचालन कर्जा इन्चार्ज रुद्रनाथ पोखरेलले गर्नुभएको थियो । सो अवसरमा राष्ट्रिय बाणिज्य बैंकका शाखा प्रमुख तथा अन्य कर्मचारीको साथमा पोखरा वृद्धाश्रमका ज्येष्ठ नागरिकको सहभागिता रहेको थियो ।
त्यस्तै सरल नमुना बचत तथा ऋण सहकारी संस्थाको आफ्नो आठौं बर्ष प्रवेशको अवसरमा पारी पोखरा वृद्धाश्रममा फलफूल वितरण गरिएको थियो । संस्थाका अध्यक्ष दीपक बास्तोलाको नेतृत्वमा गएको टोलीले वृद्धाश्रममा रहको ज्येष्ठ नागरिकलाई फलफूल वितरण गरी आफ्नो बार्षिकोत्सव मनाएको हो । आइतबार नै नेपाल आयल निगम पोखरा एअरपोर्ट शाखामा कार्यरत मनोहर डिसी र वहाँकी श्रीमती प्रतिष्ठा जिसीले विवाहको १० औं वर्षगाँठका अवसरमा नगद रु १२ हजार सहयोग गर्नुभएको छ ।
पोखरा वृद्धाश्रममा असहाय र वेवारिसे अवस्थाका ज्येष्ठ नागरिक तथा सेवक सेविका गरी ६५ जना आश्रित रहेका छन् ।
