रक्तदान कार्यक्रममा २८ युनिट रगत संकलन

पोखरा, १८ चैत्र – 

नवसाथी बचत तथा ऋण सहकारी संस्था लि.पोखरा ८ को नवौं स्थापना दिवस तथा ५९ औं राष्ट्रिय सहकारी दिवस २०७२ को सन्दर्भमा भएको रक्तदान कार्यक्रममा २८ युनिट रगत संकलन भएको छ ।

नवसाथी बचत तथा ऋण सहकारी संस्थाको प्राङ्गण सृजनाचोकमा भएको कार्यक्रममा प्रमुख अतिथि सहकारी प्रशिक्षण तथा डिभिजन कार्यालय कास्कीका प्राचार्य बद्रीनाथ अधिकारीले प्रथम रक्तदाता गंगा गिरीलाई ब्लडब्याग र बर्थ केक काटेर उद्घाटन गरेका थिए ।

कार्यक्रममा विशेष अतिथि जिल्ला सहकारी संघ कास्कीका उपाध्यक्ष हरिभक्त पौडेल, संस्थाका सल्लाहकार ई.रामचन्द्र पोख्रेल, रक्त संचार केन्द्रका प्राविधिक अर्जुन ज्ञवाली लगायतले बोलेका थिए ।

संस्थाका अध्यक्ष अर्जुन बहादुर थापाको अध्यक्षतामा भएको कार्यक्रममा स्वागत कार्यक्रम संयोजक कृष्णजी पौडेल र कार्यक्रमको संचालन सचिव शिवजी पौडेलले गरेका थिए ।