रञ्जन स्मृति कप शनिबार देखि

पोखरा, २६ चैत्र –

पोखराको लामाचौरमा शनिबारदेखी रञ्जन स्मृति सेभेन–ए साइड फुटवल प्रतियोगिता हुने भएको छ । नवआदर्श सामुदायिक विकास समाज, फुटबल एकेडेमीको आयोजनामा तत्कालिन एन्फा एकेडेमीका खेलाडी स्व.रञ्जन थापाको स्मृतिमा पोखरामा सेभेन–ए साईड फुटवल प्रतियोगिता हुन लागेको हो ।

आयोजक नवआदर्श सामुदायिक विकास समाजले शुक्रबार पोखरामा पत्रकार सम्मेलन गरी शनिबारदेखी ईन्द्र राज्यलक्ष्मी उच्च मावि. लामाचौरमा शुरु हुने प्रतियोगिता बैशाख एक गतेसम्म सञ्चालन हुने जानकारी दिएको हो । प्रतियोगिताको सम्पूर्ण तयारी पूरा भएको समाजका अध्यक्ष धर्ममानसिंह भण्डारीले बताए ।

प्रतियोगितामा २८ टिमले सहभागिता जनाउने कार्यक्रम संयोजक सुशीलकुमार श्रेष्ठले जानकारी दिए । उद्घाटन खेलमा शनिबार पोखराको नदीपुर एफ.सी. र ब्राण्डेड एफ.सी. लामाचौरबीच प्रतिष्पर्धा हुने उनले बताए ।

स्वर्गीय रञ्जन थापाले फुटवलमा पु¥याएको योगदानलाई स्मरणीय बनाउन पहिलो पटक संस्थाले प्रतियोगिता आयोजना गरेको क्लवका अध्यक्ष भण्डारीले प्रष्ट्याए । उनले यस वर्षदेखी शुरु गरिएको यो प्रतियोगिता आगामी वर्षहरुमा निरन्तर सञ्चालन गर्ने बताए ।

प्रतियोगिताको उपाधि बिजेताले एक लाख र उपबिजेता बिजेताले पचास हजार प्राप्त गर्ने आयोजकले जनाएको छ । प्रतियोगिता सम्पन्न गर्न करीब पाँच लाख लाग्ने अनुमान गरिएको क्लवका अध्यक्ष भण्डरीले बताए । प्रतियोगिताबाट बचत रकम रञ्जनकै नाममा अक्षयकोष सञ्चालन गरेर उदीयमान तथा विपन्न खेलाडीलाई प्रशिक्षण गराउने लक्ष्य राखिएको उनले बताए ।

पोखरा–१६ लामाचौर घर भएका रञ्जन थापाको बुटवलबाट काठमाडौं जाने क्रममा बस दुर्घटनामा परेर २०६९ साल साउन २३ गते निधन भएको थियो । उनी एन्फाका खेलाडी थिए ।