अछाम, १६ जेठ –
जिल्लामा सामाजिक सुरक्षाभत्ता बापतको रकम पाउने कुनै पनि नागरिकले केही महिनादेखि पाएका छैनन् ।
हरेक चौमासिकमा वितरण हुदै आएको सामाजिक सुरक्षाभत्ता बापतको रकम अन्तिम अर्थात् तेस्रो चौमासिक आइसक्दासमेत जिल्लाका ज्येष्ठ नागरिक, एकल महिला, दलित, बालबालिका लगायतले पाएका छैनन् । आठ महिनादेखि सामाजिक सुरक्षा बापतको रकम आपूmहरुले नपाएको जिल्लाका ज्येष्ठ नागरिक, एकल महिला र दलित बालबालिकाका अभिभावकले गुनासो गरेका छन् ।
तीनवटा नगरपालिका तथा ५५ गाविसमा रकम उपलब्ध गराइएको छैन । स्थानीय नागरिकले आफूहरुले गत वर्षको कात्तिक महिना पछिको सामाजिक सुरक्षाभत्ता नपाएको गुनासो गरेका छन् । “कात्तिकदेखि हालसम्मको भत्ता पाएका छैनौँ,” मङ्गलसैन नगरपालिका–६ का कामनिराम भण्डारीले भन्नुभयो ।
यस्तै सामाजिक सुरक्षाभत्ता नपाउँदा आफ्नो छाक गुजारा चालाउन अफ्ठ्यारो भएको दुर्गम ढकारी गाविसकी स्थानीयवासी सुर्जा बढाले बताउनुभयो । ज्येष्ठ नागरिकले आफूहरुका लागि सरकारले दिने भनेको औषधोपचार खर्च बापतको रकम नपाएको गुनासो गरेका छन् ।
जिल्लामा दलित ज्येष्ठ नागरिक ६ हजार ४२०, अन्य ज्येष्ठ नागरिक सात हजार ८३६, एकल महिला सात हजार ९४२, पूर्णअपाङ्ग ६५, आंशिक अपाङ्ग १७३, बालबालिका १४ हजार ९४१ र उपचार खर्च बापतको रकम पाउने ७० वर्ष उमेर पुगेका ज्येष्ठ नागरिक ११ हजार ५३२ रहेका छन् ।
जिल्ला विकास समितिले दोस्रो चौमासिकमा सामाजिक सुरक्षाभत्ता बाँड्दा जिल्लालाई करिब रु आठ करोड ४६ लाख २२ हजार ९५० बराबरको रकम अपुग भएका कारण सामाजिक सुरक्षाभत्ताको रकम वितरण गर्न नसकिएको जनाएको छ । हाल जिल्लालाई रु १६ करोड ८९ लाख ७२ हजार रकम प्राप्त भएको जिविसले जनाएको छ । रासस
