पथरी (मोरङ), ३ असार –
राष्ट्रपति चुरे मधेस संरक्षण दिवसको अवसर पारेर मोरङको बेतना सिमसारमा रहेको चिडियाखानालाई दुईवटा चित्तल एक कार्यक्रमका बीच हस्तान्तरण गरिएको छ ।
सामुदायिक वन पथरी शनिश्चरेले संरक्षण गर्दै आएको दुई थान माउ चित्तललाई पूर्व क्षेत्रीय वन कार्यालय विराटनगरका क्षेत्रीय वन निर्देशक मनबहादुर खड्काले आज हस्तान्तरण गर्नुभएको हो ।
मोरङको बेलबारीमा रहेको बेतना सिमसार पर्यटकीय गन्तव्यका रुपमा चर्चित बन्दै गएको छ । सिमसारमा कछुवा, वन बिरालो, अजिङ्गर, निलगाईलगायतका विभिन्न वन्यजन्तु संरक्षण गर्न थालिएको छ । कार्यक्रममा क्षेत्रीय वन निर्देशक खड्काले चुरे र चुरे क्षेत्र वरपरका क्षेत्रको संरक्षणमा स्थानीय जनसहभागिता महत्वपूर्ण हुने धारणा व्यक्त गर्नुभएको थियो ।
कार्यक्रममा जिल्ला वन कार्यालयका प्रमुख दीपक ज्ञवाली, वेतना सिमसारका अध्यक्ष डम्बर बस्नेतलगायतको सहभागिता रहेको थियो । रासस
