संविधान कार्यान्वयन भएको अनुभूत गराउन सरकार कटिबद्ध – सञ्चारमन्त्री राइ

पोखरान्युजडटकम, १६ असार –

सञ्चारमन्त्री शेरधन राइले सरकार जनतालाई संविधान कार्यान्वयन भएको अनुभूत गराउने ढङ्गबाट अगाडि बढेको बताउनुभएको छ ।

प्रधानमन्त्री तथा मन्त्रिपरिषद्को कार्यालयले नगरकोटमा आयोजनामा गरेको सूचना तथा सञ्चार प्रविधि एवम् विद्युतीय सुशासनसम्बन्धी दुईदिने गोष्ठीको आज उद्घाटन गर्दै उहाँले संविधानको भावना र मर्म बमोजिम जनताका माग, आकाङ्क्षा र चाहनालाई मूर्त रुप दिने चरणमा सरकार प्रवेश गरिसकेको बताउनुभयो ।

जनताले चाहेको स्थायी शान्ति स्थापनाका लागि सरकार प्रस्ट नीति, कार्यक्रम र योजनाका साथ अगाडि बढिसकेको मन्त्री राईले बताउनुभयो । उहाँले सूचना प्रविधिलाई समग्र देशको विकास र समृद्धिसँग जोड्न सकिए मुलुक विश्व समुदायसँग प्रतिस्पर्धामा उत्रन सक्ने विश्वास व्यक्त गर्नुभयो ।

मन्त्री राईले सबै गाउँ र नगरमा अप्टिकल फाइवर बिछ्याउने कार्य अगाडि बढाएको उल्लेख गर्दै अब वायरलेस सिस्टममा जाने तयारी भइरहेको जानकारी दिनुभयो ।

कार्यक्रममा मुख्य सचिव डा सोमलाल सुवेदीले मन्त्रालयमा सूचना तथा सञ्चार क्षेत्रको सुशासनलाई अझ प्रभावकारी बनाउन आवश्यक रहेको औँल्याउनुभयो ।

कार्यक्रममा प्रधानमन्त्री तथा मन्त्रिपरिषद्को कार्यालयका सचिव केदारबहादुर अधिकारी, विज्ञान तथा प्रविधि मन्त्रालयका सचिव अनुपकुमार उपाध्याय, नेपाल दूरसञ्चार प्राधिकरणका अध्यक्ष दिगम्बर झालगायतले मुुलुकका तल्लो तहका सरकारी कार्यालयमा सूचना तथा सञ्चार प्रविधि प्रभावकारी बनाउनुपर्नेमा जोड दिनुभयो ।

दुईदिनसम्म चल्ने गोष्ठीमा अर्थ, गृह, सूचना तथा सञ्चार, विज्ञान तथा प्रविधि, परराष्ट्र, सङ्घीय मामिला तथा स्थानीय विकास, भौतिक पूर्वाधार तथा यातायात, भूमिसुधार मन्त्रालयका साथै लोकसेवा आयोग र निर्वाचन आयोगका सूचना, प्रविधि तथा विद्युतीय सुशासनसम्बन्धी गतिविधिका बारेमा छलफल गरिने छ । रासस