पूर्वमन्त्री मानन्धरप्रति श्रद्धाञ्जलि

पोखरान्युजडटकम, १८ असार –

सङ्घीय समाजवादी फोरम नेपालका नेता एवम् पूर्वमन्त्री डा मङ्गलसिद्धि मानन्धरको पार्थिव शरीरमा विभिन्न राजनीतिक दलका नेताहरूले श्रद्धाञ्जलि अर्पण गर्नुभएको छ ।

खुलामञ्चमा नेकपा (माओवादी केन्द्र) का अध्यक्ष पुष्पकमल दाहाल, सभामुख ओनसरी घर्ती, नेकपा (क्रान्तिकारी माओवादी) का उपाध्यक्ष सिपी गजुरेल, नेकपा (एमाले) का सचिव प्रदीपकुमार ज्ञवाली, माओवादी केन्द्रका नेता वर्षमान पुन र सांसद श्याम श्रेष्ठ लगायत मधेसकेन्द्रित दलका नेताहरूले श्रद्धाञ्जलि अर्पण गर्नुभयो ।

समाजवादी फोरम सल्लाहकार परिषद्का सभापति मानन्धरको पार्थिव शरीर श्रद्धाञ्जलिका लागि बिहान पार्टी कार्यालय तीनकुने र त्रिचन्द्र कलेजमा राखिएको थियो । स्व मानन्धरको आजै पशुपति आर्यघाटमा बौद्ध परम्परानुसार अन्त्येष्टि गरिने समाजवादी फोरमका महासचिव रणध्वज कन्दङ्वाले जानकारी दिनुभयो ।

मानन्धरका श्रीमती, दुई छोरा र एक छोरी हुनुहुन्छ । मानन्धर राष्ट्रिय योजना आयोगका पूर्वउपाध्यक्ष र नेपाल प्राध्यापक सङ्घका अध्यक्ष समेत हुनुहुन्थ्यो । रासस