पोखरामा पौने ६ किलोग्रामको शिशुको जन्म

पोखरान्युजडटकम, १८ असार –

पोखरामा एक महिलाले पौने ६ किलोग्राम भएको शिशुको जन्म दिएकी छन । स्याङ्जाको एलादी गाविस एक घर भएका हाल पोखरा काजीपोखरी बस्दै आएकी २८ वर्षीया लक्ष्मी गुरुङ्गले ५ किलो ७ सय ५० ग्रामको छोरा जन्माएकी हुन् ।

शुक्रबार साँझ ५ः४६ बजे पोखराको रानीपौवामा रहेको साइ अर्चना हस्पिटलमा शल्यक्रियाबाट असाधारण तौल भएको शिशुको जन्म भएको उपचारमा संलग्न डा. अर्चना (इन्दु) पुनले बताईन । उनका अनुसार शिशु र आमाको स्वास्थ्य अबस्था सामान्य रहेको छ । सामान्यतया ५ किलोग्रामसम्मको शिशु जन्म भएको थाहा पाएकी डा.अर्चनाले पौने ६ किलोग्रामको शिशु जन्मेकोले आफु अचम्म भएको बताइृन । शिशुको लम्बाई ५७ सेन्टिमिटर रहेको लक्ष्मीका श्रीमान् होम बहादुर गुरुङ्गले बताए । गुरुङकोे यो दोस्रो सन्तान हो । लक्ष्मी आफैं पनि अचम्ममा परेकी छन् ।

अन्य शिशु भन्दा धेरै तौल भएको शिशु जन्मिएपछि पश्चिमाञ्चल क्षेत्रीय अस्पताल रेफर गरिएको हो । शिशुलाई अहिले एनआइसियुमा राखेर रेखदेख गरीएको अस्पतालका डा. रामचन्द्र बास्तोलाले जानकारी दिए । अस्पतालका मेडिकल सुपरिटेण्डेण्ट डा. श्रीकृष्ण श्रेष्ठले ४ किलो ५ सय ग्रामसम्मको शिशु जन्मेको भए पनि पौने ६ किलोको शिशु जन्मनु असामान्य भएको बताए । शिशुको अबस्था सामान्य भए पनि असाधारण तौल भएकोले शिशुको रक्त संचार सहित स्वास्थ्य अबस्थालार्ई आफुहरुले बढी ध्यान दिनु पर्ने बताए ।

लक्ष्मीलाई शुक्रबार बेथा लागेपछि रानीपौवाको साइ अर्चना अस्पताल भर्ना गरिएको थियो । शुक्रबार साँझ शल्यकृयाबाट शिशुको जन्म भएको हो । गर्भवती अवस्थामा निकै कम जचाउन आउने लक्ष्मीलाई गर्भ रहेको ५ महिना पछि मात्रै थाहा भएको थियो । शुक्रबार बेथा लागेपछि अस्पताल ल्याइँदा मज्जाले मासुभात खाएर आएको बताएपछि ६ घण्टा पर्खाएर मात्रै शल्यकृया गरिएको डा. पुनले बताइन । उनले भनिन“ मलाइ भिडियो डाक्टरले आमाको बोसो धेरै छ अपरेसन गाह्रो होला भनेका थिए, अप्रेसन त गरियो तर, अरु सबै नर्मलै रह्यो, म आफैं छक्क परेकी छु ।” जन्मँदा ६ किलो तौल देखिएको बच्चा डिजिटल तौल मेसिनमा ५ किलो ७ सय ५० ग्राम देखिएको छ ।