कारबाही गरेका व्यक्तिलाई सम्मान गर्न नहुने

भक्तपुर, २७ असार –

राष्ट्रिय सूचना आयोगका प्रमुख आयुक्त कृष्णहरि बाँस्कोटाले आयोगले कारबाही गरेका व्यक्तिलाई सरकारले कुनै पनि सम्मान गर्न नहुने बताउनुभएको छ ।

रफत् सञ्चार क्लबले आयोजना गरेको साक्षात्कार कार्यक्रममा बोल्दै उहाँले सूचनाको हकमा नेपालीको अग्रसरता बढ्दै गए तापनि सहजै सूचना उपलब्ध गराउने परम्पराको थालनी अझै भइनसकेको बताउनुभयो । उहाँले संविधान संशोधन गर्दा सूचना हकको धारा २७ त्रुटिपूर्ण र अपुरो रहेकाले त्यसमा परिमार्जन गर्न आवश्यक रहेको उल्लेख गर्नुभयो ।

सूचना अधिकारी सरकारकै पुराना कर्मचारी भएकाले केही अवरोध भएका कारण सञ्चार र कानुन अध्ययन गरेकालाई सूचना अधिकारी नियुक्ति गर्न सके सूचनाको हकमा सहजता आउने उहाँको भनाइ थियो ।

सूचना आयोगको गठनसँगै एक हजार ६०० मुद्दामा फैसला गरिसकेको भन्दै उहाँले सूचनाको हकमा अवरोध पु¥याउने र नेपालीले मागेको सूचना उपलब्ध गराउन हिचकिचाहट गरे उनीहरुलाई कारबाहीको दायरामा ल्याउन सक्ने बताउनुभयो । रासस