माओवादी केन्द्रको समर्थन फिर्तासँगै सरकार अल्पमतमा

काठमाडौँ, २८ असार –

सत्ता साझेदार मुख्य दल नेकपा माओवादी केन्द्रले सरकारलाई दिएको समर्थन फिर्ता गर्दै बाहिरिएको छ ।

माओवादी केन्द्रका अध्यक्ष पुष्पकमल दाहालले सरकारलाई दिएको समर्थन फिर्ता गर्दै आफ्ना मन्त्री वाहिरिएको पत्र प्रधानमन्त्री केपी ओली र राष्ट्रपति बिद्यादेवी भण्डारीलाई बुझाई सक्नुभएको छ । सहमतीय सरकारका लागि भन्दै हिजो दिनभर प्रयास गरेको माओवादी केन्द्रले आज सरकारबाट वाहिरिने निर्णय गरेको हो । निर्णय सार्वजनिक गर्न सो पार्टीले दिउँसो २ बजे पत्रकार सम्मेलन आयोजना गरेको छ । माओवादी केन्द्रको निर्णयसँगै वर्तमान सरकार अल्पमतमा परेको छ । माओवादी केन्द्रको निर्णयपछि के गर्ने भन्नेबारे छलफल गर्न प्रधानमन्त्री ओलीले आन्तरिक छलफल शुरु गर्नुभएको छ । यसअघि सो पार्टीले सरकारबारे निर्णय गर्ने जिम्मेवारी पार्टी अध्यक्ष पुष्पकमल दाहाललाई दिएको थियो ।

दाहालले हिजो प्रधानमन्त्री केपी ओली र कंग्रेस सभापति शेरवहादुर देउवासँग छलफल गर्नुभएको थियो । देउवाले अर्को सरकार बनाउने भए तत्काल सरकारबाट फिर्ता हुन आग्रह गर्नुभएको थियो । माओवादी केन्द्रले प्रधानमन्त्री ओलीले यसअघि भएको ९ बुँदे लिखित र अर्को भद्र सहमति पालना नगरेको आरोप लगाएको छ ।