मोटरसाइकल दुर्घटनामा वृद्धाको मृत्यु

उर्लाबारी (मोरङ), २८ असार –

मोरङको हात्तीमुढा–८ स्थित कोसी राजमार्गमा आज अपराह्न बसको ठक्करबाट मोटरसाइकलमा सवार एक वृद्धाको मृत्यु भएको छ ।

विराटनगरबाट इटहरीतर्फ आउँदै गरेको को५प १५२५ नम्बरको मोटरसाइकललाई पछाडिबाट आउँदै गरेको ना५ख ६५८४ नंको बसले ठक्कर दिँदा दुर्घटना भएको थियो । दुर्घटनामा परी मोटरसाइकलको पछाडि सवार सुनसरीको धरान–१५ बस्ने ६५ वर्षीया अम्बिकादेवी अधिकारीको घटनास्थलमै मृत्यु भएको हो ।

दुर्घटनामा मोटरसाइकलका चालक झापा, कन्काई–३ का ३२ वर्षीय खेम चौधरी सामान्य घाइते भएका छन् । ठक्कर दिने बस र त्यसका चालकलाई इलाका प्रहरी कार्यालय निमुवाले नियन्त्रणमा लिएको छ । रासस