वृद्ध मृत अवस्थामा फेला

भीमदत्तनगर, २९ असार –

कञ्चनपुरको भीमदत्तनगरपालिका–२ ऐरीका एक वृद्ध मङ्गलबार मृत अवस्थामा फेला परेका छन् ।

जिल्ला प्रहरी कार्यालयका प्रहरी निरीक्षक पदम थापाका अनुसार ऐरीका स्थानीय ५५ वर्षीय चन्द्र सोनाहा धानखेतमा मृत अवस्थामा फेला परेका हुन् ।

स्थानीयले ऐरीचौराह नजिकै मृत अवस्थामा सोनाहालाई देखेपछि प्रहरीलाई खबर गरेका थिए । प्रहरी अनुसन्धानले उहाँको मादक पदार्थ सेवनका कारण मृत्यु भएको हुनसक्ने बताएको छ ।

मृतक सोनाहाको शव परीक्षणका लागि भीमदत्तनगरस्थित महाकाली अञ्चल अस्पतालमा राखिएको प्रहरीले जनाएको छ । रासस