पोखरा न्यूज – १८ , बैशाख ।
पोखरा विमानस्थलको धावनमार्गमा यति एयरलाइन्सको विमानको चक्का (ह्विल ) लक भएपछि केहीबेर उडान अवरूद्ध भएको छ । काठमाण्डौ वाट पोखराका लागी उडेको यति एयरलाइन्सको 9N-AHU विमान विमानस्थलमा ल्याण्ड गरिसकेपछि धावनमार्ग को उत्तर छेउ तर्फबाट मोडने क्रममा ह्विल लक भएको हो ।
सोमबार दिउसो करिब २:३० बजे काठमाण्डौबाट पोखरा आएको उक्त बिमान ल्याण्ड गर्दा टर्न गर्ने बेलामा अगाडिको ह्विल लक भएको थियो । बिमान धावनमार्गमा अवतरण भइसकेकपछी यु टर्न गर्ने बेलामा विमानको अगाडिको ह्विल लक भएकाले बिमान धावनमार्गमै रोकिन पुगेको नागरिक उड्डयन कार्यालय पोखराका प्रमुख भोला प्रसाद गुरागाईले पोखरा न्युजलाई बताए । अवतरण भइसकेकपछी सामान्य अवस्थामा चक्का लक भएकोले जहाजमा सवार यात्रुहरुलाई कुनै असर नपरेको गुरागाईले बताए ।
विमानस्थल प्राविधिक टोलीले सामान्य मर्मत गरेपछि बिमानलाई आफ्नो स्थानमा पुर्याइएको र उडान सुचारु भइसकेको गुरागाईले पोखरा न्युजलाई जानकारी दिए ।
विमान धावनमार्गमा लक हुदा करिब एक घण्टा हवाई उडान प्रभावित भएको थियो ।
