पोखरा न्युज –
महिला, बालबालिका तथा समाज कल्याणमन्त्री आशा कोइरालाले ज्येष्ठ नागरिक र अपाङ्गको संरक्षणमा राज्यको विशेष ध्यान पुग्नु जरुरी रहेको बताउनुभएको छ ।
महिला तथा बालबालिका विभागको आयोजनामा सोमबार पोखरामा आयोजित वार्षीक समीक्षा गोष्ठीमा उहाँले सीमित भत्ताले मात्रै उनीहरुको गुजारा नचल्ने भएकाले जीविकोपार्जनका लागि राज्यले जिम्मा लिनुपर्ने विचार व्यक्त गर्नुभयो ।
मन्त्री कोइरालाले स्थानीय तहमा निर्वाचित महिलालाई सक्षम र जिम्मेवारी बोध बनाउन विशेष कार्यक्रमको खाँचो रहेको पनि बताउनुभयो ।
मन्त्रालयका सचिव खगराज बरालले हरेक काममा महिलाको सहभागिता प्रभावकारी बन्दैगएको धारणा व्यक्त गर्नुभयो ।
विभागका महानिर्देशक नरेशकुमार चापागाईंको अध्यक्षतामा भएको सो कार्यक्रममा कास्कीका प्रमुख जिल्ला अधिकारी तारानाथ अधिकारी, उपसचिव विजयाकुमारी प्रसाईंलगायतले बोल्नु भएको थियो ।
सो वार्षीक समीक्षा गोष्ठीमा ७५ जिल्लाका प्रमुख महिला विकास अधिकृत र महिला विकास अधिकृतको सहभागिता रहेको जनाएको छ । रासस
