पोखरा न्यूज -१०, जेठ । रोजगारी नपाएर दिनहूँ हजारौँ युवा रोजगारीको खोजीमा भौँतारिरहेका बेलामा स्याङ्जाकी अनिता गन्धर्व भने मादलमा आफ्नो भविष्य खोज्दै । पुतलीबजार नगरपालिका–१ स्थित जिल्ला सदरमुकामको नजिकै रहेको घरमा २१ वर्षीया अनिता मादल बनाएर राम्रो आम्दानी गर्न सफल भएकी छन् ।
अनिताको दैनिकी बिहानदेखि साँझसम्म मादल बनाउने र खरी लगाउँदैमा बित्ने गर्छ । मादलमा खरी लगाउँदै गर्दाको अवस्थामा भेटिकी अनिताले पहिला लजाउँदै कुरा गर्न अलि अप्ठेरो मानिन । केही बेरको कुराकानीपछि खुलेरै आफ्नो व्यवसायका बारेमा बताइन् । घरमा यत्तिकै बस्नुभन्दा काम गर्दा समय कटाउन सजिलो हुने उनले सुनाइन् । शुरुमा अप्ठ्यारो जस्तो भए पनि काम गर्दै जाँदा अहिले आएर कमाइको राम्रो माध्यम हुने रहेछ भन्ने बुझेपछि यसैमा अभ्यस्त हुन थालेको अनिताले अनुभव सुनाइन् ।
दुई वर्षदेखि मादल बनाउँदै आएकी अनिताले मासिक रु २५ देखि रु ३० हजारसम्म कमाइ हुने बताइन् । “काम भन्ने कुरा सानो ठूलो हुँदैन यतिकै बसेर अरूको कमाइको आश गर्नुभन्दा आफूले सकेअनुसारको काम गर्दा आवश्यक खर्च जुटाउन सकिन्छ”, अनिताले भनिन । परिवारको आश गर्न नपर्ने र घरपरिवार चलाउन सजिलो हुने भएकाले सीपअनुसारको काम गर्दा राम्रो हुने उनको सुझाव थियो । अनिताले यो पेशाबाट आफू सन्तुष्ट रहेको बताइन् ।
कमाउनकै लागि विदेश जानुभन्दा आफ्नै देशमा घर परिवार सँंगसंँगै बसेर सानोठूलो आफ्नो क्षमतानुसारको काम गर्न अनिताले आग्रह गरिन । एउटा मादल रु तीन हजारदेखि रु पाँच हजारसम्ममा विक्री हुन्छ । मादल बनाउन आवश्यक पर्ने सामग्रीको व्यवस्था घरपरिवारले जुटाइदिने गरेका छन् ।
उत्तिस, गोएलो, सिरिसलगायतको काठ र छालाको प्रयोग गरेर मादल बनाइने अनिताले सुनाइन् । उनको श्रीमान्ले ठेक्कापट्टाको काम गर्छन । अनिताको काममा घर परिवारका सबैको सहयोग रहेको छ । एउटा मादल बनाउन चारदेखि पाँच दिनसम्म लाग्छ । सीप र जाँगर भए परिवार पाल्नकै लागि विदेशिनु पर्दैन भन्दै उनले आफ्नै देशमा इलम गरेर घरपरिवारको खर्च चलाउन सकिन्छ भन्ने उदाहरण देखाएकि छन ।
