मिस तामाङ पोखराका प्रतियोगीले देखाए प्रतिभा

पोखरा न्यूज – २६, पुष । मिस तामाङ पोखराका प्रतियोगीहरुले आफुमा अन्तरनिहित  प्रतिभा देखाएका छन् । बैदाम तामाङ सेवा समाजको आयोजनामा हुन लागेको मिस तामाङ पोखरा २०२० का प्रतिस्पर्धी बिच शनिबार ट्यालेण्ट राउण्ड सम्पन्न भएको हो । मञ्जुश्री संवत २८५६ औं सोनाम ल्होसारको अवसरमा समाजले ७ औं ल्होसार महोत्सब तथा चौंथो मिस तामाङ पोखरा आयोजना गर्दैछ ।

शनिबार सम्पन्न ट्यालेण्ट राउण्डमा प्रतियोगिहरुले कविता, गायन, नृत्य तथा भाषणकला मार्फत आफ्नो प्रस्तुती राखेका थिए । प्रतियोगिहरु मध्य आकृति भोलान लामा, सृजना घिसिङ्ग तामाङ , सुजाता गोले तामाङ र सृजना ब्लोन तामाङ ले कविता वाचन गरेका थिए । यस्तै, किस्मत स्याङ्गवो तामाङ , कोमल तामाङ , सलिना तामाङ , विन्दु वाइवा तामाङ , मनिषा गोम्जा तामाङ , सुमिक्षा तामाङ , प्रिती वाइवा तामाङ , अनिशा तामाङ , सरस्वती थोकर तामाङ र स्वस्तिका तामाङले नृत्य प्रस्तुत गरेका थिए । कार्यक्रममा शसिकला तामाङ्ग र भुमिका तामाङले भाषणकला तथा रेनु स्याङ्गतान तामाङले गीत गाएका थिए ।

ट्यालेण्ट राउण्डमा निर्णायकहरु नेपाल तामाङ्ग महिला घेदुङ्ग कास्कीका कार्यबाहक अध्यक्ष पवित्रा तामाङ , पोखरा कला केन्द्रका प्रबन्ध निर्देशक राखीमाया तामाङ्ग र नेपाल पत्रकार महासंघ कास्कीका कोषाध्यक्ष सन्जय मल्ल रहेका थिए । कार्यक्रममा बोल्दै बैदाम तामाङ्ग सेवा समाजका अध्यक्ष ज्याक तामाङले मिस तामाङ्ग पोखराका प्रतियोगीहरुले तालिम अवधीमा तामाङ समुदायको भाषा, धर्म र संस्कारका साथै व्यक्तित्व र नेतृत्व सम्बन्धि जीवनोपयोगी ज्ञान हासिल गरेको बताए ।

कार्यक्रम संयोजक तथा मिस तामाङ्ग पोखरा २०१८ कविता योञ्जनले मानिसले जन्मजात केही पनि सिकेर आएको हुदैन, आफुले पनि मिस तामाङ्गको मञ्चबाट धेरै कुरा हासिल गरेको सुनाइन् । बैदाम तामाङ्ग सेवा समाजका उपाध्यक्ष जयन्ती मोक्तानले आफ्नो संस्कार, भाषा र संस्कृति बारे घरबाटै सिकाउन शुरु गर्नु पर्ने बताइन् । उनले आफ्नो मौलिक मातृभाषाको प्रयोगले कोही पनि सानो तथा कमजोर नहुने बरु बलियो हुने पनि बताइन् ।

पोखरा सभागृहमा माघ ४ गते शनिवार हुने प्रतियोगिताको विजेताले ताज, ट्रफी, प्रमाणपत्र सहित नगद १ लाख रुपैयाँको साथमा म्युजिक भिडियोको अवसर तथा आकर्षक गिफ्ट ह्याम्परहरु प्रदान गरिने आयोजकले जनाएको छ । फस्ट रनर अपले ताज, ट्रफी, प्रमाणपत्र सहित नगद ५० हजार रुपैयाँ हजार प्राप्त गर्नेछ । त्यस्तै सेकेण्ड रनर अपले ताज, ट्रफी, प्रमाणपत्र सहित नगद ३० हजार रुपैयाँ हात पार्नेछन् । भ्युवर्स च्वाइसका रुपमा एकजनाले नगद २० हजार पुरस्कार समेत प्राप्त गर्नेछन ।

सन् २०१६ देखि शुरु भएको मिस तामाङ पोखराको पहिलो संस्करणमा निमा लामा, दोस्रो संस्करण २०१७ मा दिप्ती गोम्जा, तेस्रो संस्करण २०१८ मा कविता योञ्जन र चौथो संस्करण २०१९ मा कुशुम स्याङवो तामाङले ताज पहिरिन सफल भएकी थिइन् । नारीलाई निकै महत्वपूर्ण स्थान दिने तामाङ जातीको छोरी चेलीहरुको व्यक्तित्व र नेतृत्व विकास गरि उनिहरुको प्रतिभालाई प्रस्फुटन गर्न हरेक वर्षझैँ यो वर्ष पनि बैदाम तामाङ सेवा समाजले विभिन्न सांस्कृतिक कार्यक्रमको साथमा सातौं ल्होसार महोत्सव तथा पाचौँ मिस तामाङ पोखरा २०२० आयोजना गर्न लागेको आयोजकको दावी छ ।

सम्बन्धित न्यूज

Leave a Reply

Your email address will not be published. Required fields are marked *

Back to top button