भारत। कोरोना भाइरसको महामारीसँग जुध्न भारतको स्वास्थ्य मन्त्रालयले आफ्ना स्वास्थ्यकर्मीका लागि २१ लाख पर्सनल प्रोटेक्सन इक्विपमेन्ट (पिपिई) को माग गरेको छ ।
उसले आफ्नै देशका कम्पनीलाई सो संख्यामा पिपिई निर्माण गर्न माग आह्वान गरेको हो । अब भारतकै ११ वटा कम्पनीले पिपिई बनाएर देशभरको माग धान्नेछन् । हाल ६० हजार पिपिई देशभर वितरण गरिसकिएको जनाइएको छ । कोरोना महमारीका बेला पिपिई, मास्क, भेन्टिलेटर जस्ता अनिवार्य सामाग्रीको अभाव हुन नदिन भारत सरकारले आन्तरिक उत्पादन, खरीद र ढुवानीमा विशेष ध्यान दिएको पनि जनाइएको छ ।
अहिले ११ कम्पनीले दैनिक ५ देखि ७ हजार पिपिई उत्पादन गरिरहेकोमा अबको एक हप्तामा उत्पादनलाई दोब्बर भन्दा बढीले वृद्धि गर्दै १५ हजार पुर्याइने लक्ष्य रहेको पनि मन्त्रालयले जनाएको छ । सोमबार नै अर्को एक नयाँ कम्पनी पनि थपिएको र त्यहाँ ५ लाख पिपिई अर्डर गरेको पनि मन्त्रालयले उल्लेख गरेको छ ।
यस अघि भारतमा पिपिई नबानाइएको भएतापनि कोभिड-१९ को महामारीलाई व्यवस्थापन गर्ने हेतुले देश भित्रै ठुलो मात्रामा उत्पादन थालिएको पनि बताइएको छ । पछिल्लो समय देशभर माग बढेको तथा कैयौं अस्पतालमा पिपिई नभएको गुनासो आएसँगै भारत सरकारले उत्पादन थालेको हो ।
त्यस्तै भारतमै ४० हजार भेन्टिलेटर निर्माणका लागि पनि आवेदन दिइएको जनाइएको छ । भारतका आग्भा हेल्थकेयर र भारत इलेक्ट्रोनिक्स लिमिटेडले भेन्टिलेटर निर्माण गर्नेछन् । त्यस्तै चीनबाट पनि १० हजार भेन्टिलेटर मगाइनेछ ।
भारतमा हाल ३ लाख ३४ हजार थान पिपिई र १४ हजार भेन्टिलेटर रहेको तथ्यांक छ ।
