पोखरा । गण्डकी प्रदेशको बागलुङमा चैत महिनामा फेला परेका २ जना कोरोना संक्रमित निको भएर घर फर्किएपछि ग्रिन जोन भनिने गरेको गण्डकी प्रदेशमा पुन: संक्रमित भेटिएका छन् ।
प्रदेशको नवलपुर जिल्लामा विहिवार दिउसो एक जनामा कोरोना संक्रमण पुष्टि भएको हो । नवलपरासी पूर्वको देवचुली नगरपालिका– १२ का ४९ वर्षिय पुरुषमा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
मन्त्रालयका सहप्रवक्ता समीरकुमार अधिकारीले भरतपुर अस्पताल कोभिड – १९ प्रयोगशालामा गरिएको परीक्षणमा उक्त व्यक्तिमा कोरोना संक्रमण पुष्टि भएको जनाएका छन् । यो सँगै नेपालमा कोरोना संक्रमितको संख्या २ सय ४६ पुगेको छ ।
गण्डकी प्रदेश स्वास्थ्य निर्देशनालयले समेत गण्डकी प्रदेशमा पुन : संक्रमण देखिएको भन्दै सुरक्षित रहन सबैलाई आग्रह समेत गरेको छ ।
बागलुङमै कोरोनाको आशंका पछि एक महिलाको स्वाब संकलन गरी परीक्षणका लागि पोखरा ल्याउन लागिएको गण्डकी प्रदेश स्वास्थय निर्देशनालयका निर्देशक डा. विनोद विन्दु शर्माले पोखरा न्यूजलाई बताए ।
बागलुङ गल्कोट निवासी ६५ बर्षिया एक महिलामा कोरोनाको शंकास्पद लक्षण देखिएपछि स्वाब संकलन गरि परीक्षणका लागि भर्खरै गाडीबाट पोखरा पठाइएको धौलागिरी अंचल अस्पताल प्रमुख डा. शैलेन्द्र वि पोखरेलले जानकारी दिए ।
उच्च ज्वरो र खोकी जस्ता समस्या देखिएकी उनलाई कोरोनाको आशंकामा अस्पतालको आइसोलेसनमा राखेर उपचार गरिएको डा. पोखरेलले पोखरा न्यूजलाई बताए ।
डा. पोखरेलले त्यहाँबाट पर्सा गएका मजदुरमा संक्रमण भेटिएपछि मजदुरलाई लिएर गएको बसका चालक, सहचालक र उनीहरुको सम्पर्कमा आएका व्यक्ति लगायत १२/१३ जनाको समेत स्वाव संकलन परीक्षणका लागि पोखरा पठाइएको बताए ।