पोखरा । गण्डकी प्रदेशमा थप २ जनामा कोरोना पुष्टि भएको छ ।
भारतबाट आई स्याङजाको वालिङमा क्वारेन्टिनमा रहेका १० जनाको स्वाव संकलन गरी पोखरामा पीसीआर परीक्षण गर्दा दुई जनामा कोरोना पोजिटिभ देखिएको गण्डकी प्रदेश स्वास्थ्य निर्देशनालयका निर्देशक डा. विनोद विन्दु शर्माले जनाए ।
भारतबाट चार दिनअघि आएका वालिङ नगरपालिका -७ का २० र २९ वर्षीय पुरुषमा संक्रमण पुष्टि भएको र उनीहरुको हाल जिल्ला अस्पताल स्याङ्जाको आइसाेलेसन कक्षमा उपचार भइरहेको निर्देशक डा. शर्माले जानकारी दिए ।
यो सँगै गण्डकी प्रदेशमा संक्रमित हुनेको संख्या ६ पुगेको छ । प्रदेशको बागलुङमा भेटिएका २ जना संक्रमित उपचारपछि घर फर्कीसकेका छन् भने नवलपुरका २ जना उपचाररत रहेको छन् । यस अघि संक्रमित एक जना लमजुङका भनिएका बालक भने धादिङ् जिल्लाका भएको बताइएको छ ।