पोखरा । पोखराबाट तीन दिन अघि उपचारका लागि काठमाण्डौ लगिएका एक व्यक्तिमा कोरोना संक्रमण पुष्टि भएको छ ।
काठमाण्डौको धुम्बाराहीस्थित ह्याम्स अस्पतालमा उपचाररत उनमा शुक्रबार कोरोना संक्रमण देखिएको हो । पोखरामा बस्दै आएका उनमा कोरोना भाइरसको संक्रमण पुष्टि भएको उनका एक आफन्तले पोखरा न्यूजलाई जानकारी दिए ।
तीन दिन अघि अकस्मात बिरामी भएका उनलाई पोखराको एक निजि अस्पतालमा उपचार पश्चात थप उपचारका लागि काठमाण्डौ लगिएको थियो ।
स्वास्थ्य तथा जनसंख्या मन्त्रालयका प्रवक्ता डा. विकास देवकोटाले शुक्रबारको नियमित अपडेटका क्रममा काठमाण्डौको एक निजी अस्पतालमा उपचाररत कास्कीका एक जनामा कोरोना संक्रमण पुष्टि भएको बताएका थिए ।
उनमा कोरोना संक्रमण पुष्टि भएपछि मन्त्रालयले अहिले उनको सम्पर्कमा आएका व्यक्तिहरुको कन्ट्याक्ट ट्रेसिङ गर्न शुरु गरिसकेको छ ।
उनी पोखरा -८ आलुमाइला चोकमा डेरामा बस्दै आएका व्यक्ति हुन् ।