पोखरा । पोखरा महानगरमा थप ९ जनामा कोरोना भाइरस संक्रमण पुष्टि भएको छ ।
स्वास्थ्य निर्देशनालय गण्डकीले बुधबार बिहान पोखरा महानगरपालिकाका ९ जना पुरुषमा कोरोना भाइरस देखिएको जनाएको हो ।
संक्रमितलाई आइसोलेसनमा लैजाने तयारी भैरहेको निर्देशनालयले जनाएको छ । यस सँगै गण्डकी प्रदेशमा कोरोना संक्रमितको संख्या १ हजार ५ सय ५२ पुगेको छ ।
आज संक्रमण देखिनेहरुमा भारतबाट आएर महानगरको क्वारेन्टिन तथा होम क्वारेन्टिन बसेका व्यक्तिहरु रहेको महानगरका स्वास्थ्य महाशाखा प्रमुख हेमन्त पौडेलले जानकारी दिए ।
संक्रमण पुष्टि हुनेहरुमा ७ जना लेकसिटी हस्पिटलको क्वारेन्टिनमा बसेका पुरुषहरु रहेको र २ जना होम क्वारेन्टिनमा सुरक्षित रुपमा बसेका व्याक्ति रहेको पौडेलले जनाए । उनीहरु मध्ये ५ जना भारतबाट आएका पुरुष , ३ जना बाराबाट आएका पुरुष र १ जना सर्लाहीबाट आएका पुरुष रहेको पौडेलले पोखरा न्यूजलाई बताए ।
गण्डकी प्रदेशमा हालसम्म संक्रमित मध्ये १ हजार ३ सय ५४ जना निको भएर घर फर्किएका छन् ।
