पोखरा । कास्की प्रहरीले चोरीको आरोपमा दुई युवायुवतीलाई पक्राउ गरेको छ ।
पोखरा–१३ गौडाको मुख स्थित जयगंगामार्ग निवासी ठाकुरप्रसाद पोख्रेलको घरमा चोरी गर्ने दुई व्यक्ति पक्राउ परेको कास्की प्रहरीले जनाएको हो ।
घरधनी पोखरेल अष्ट्रेलिया रहेको बेलामा घरको चावी फोरी घरभित्र रहेका सामाग्रीहरु चोरी गर्ने पोखरा–१२ निवासी २३ वर्षीय सन्तोष लामिछाने र २० वर्षीया रोशनी थापामगर (लामिछानेलाई ) शुक्रबार पक्राउ परेको कास्की प्रहरी प्रवक्ता डिएसपी सुबास हमालले जानकारी दिनुभयो ।
डिएसपी हमालका अनुसार प्रहरीले उनीहरुको साथबाट ४२ इन्चको टिभी, क्यामेरा,कुकर, भाडावर्तन, लत्ताकपडा गरी १ लाख ९५ हजार ५ सय ५० रुपैयाँ बराबरको चोरीको सामान बरामद गरेको छ ।
पक्राउ परेकाहरु उपर चोरी तथा डाँका कसुरमा म्याद थप गरी अनुसन्धान भइरहेको प्रहरीले जनाएको छ ।