पोखरा न्यूज । पोखरामा कार्तिक १ गते कोरोना संक्रमण पुष्टि भएकी पर्वतकी एक महिलाको मृत्यु भएको छ ।
बागलुङको बागलुङ नगरपालिका-१३ स्थायी घर भई पर्वतमा बस्दै आउनुभएकी ४८ वर्षिया महिलाको आइतबार साँझ ७ बजे कुश्मा नगरपालिका – ५ मा निधन भएको स्वास्थ्य निर्देशनालय गण्डकीका निर्देशक डा. विनोद विन्दु शर्माले जानकारी दिनुभयो ।
पोखरा स्वास्थ्य विज्ञान प्रतिष्ठानमा उपचाररत महिलामा कार्तिक १ गते कोरोना संक्रमण पुष्टि भएकोमा हस्पिटलले होम आइसोलेशनमा बस्न सिफारीस गर्दै डिस्चार्ज गरेपछि कार्तिक २ गते आइतबार पर्वत पुगेकी महिलाको सोहिदिन निधन भएको हो ।
स्रोतका अनुसार स्वास्थ्यमा समस्या आएपछि असोज २८ गते उपचारको लागि पोखरा आएकी महिलालाई कोरोना पुष्टि भएपछी हस्पिटलले होम आइसोलेशनमा बस्ने सिफारिस सहितको पत्र दिएको थियो । हस्पिटलको सिफारिस पछि उहाँ भाडाको ट्याक्सी प्रयोग गरेर पर्वत पुग्नुभएको थियो ।
गण्डकी प्रदेशमा हालसम्म कोरोना संक्रमणबाट मृत्यु हुनेको संख्या ५१ पुगेको छ ।