पाेखरा न्यूज । गाउँ तथा नगर अधिवेशनमा कांग्रेस वरिष्ठ नेता रामचन्द्र पौडेल समूह गृहजिल्ला तनहुँमा कमजोर देखिएको छ । जिल्लाका आठ स्थानीय तहमा शनिबार अधिवेशन सम्पन्न भएको थियो । दुईमा सर्वसम्मत र ६ स्थानीय तहमा मतदानमार्फत नेतृत्व चयन भएको थियो । दुई स्थानीय तहमा भने अधिवेशन स्थगित भएको छ ।
१४औँ महाधिवेशनमा सभापति उठ्ने बताइरहनु भएका वरिष्ठ नेता पौडेल निकटले आठमध्ये दुई स्थानीय तहमा मात्र सभापति जितेका छन् । पौडेलको गृहजिल्लामा संस्थापन शेरबहादुर देउवा पक्ष बलियो देखिएको छ । देउवानिकट शंकर भण्डारीलगायतका नेता निकटले चार स्थानीय तहमा सभापति जितेका छन् । रामचन्द्र र प्रदिप पौडेलनिकटले दुई÷दुई स्थानीय तहमा सभापति जितेका हुन् ।
रामचन्द्रको आफ्नै गृहनगर व्यास र भानु नगरपालिकामा उहाँ निकटले सभापति जित्नुभएकाे छ । व्यासको सभापतिमा सूर्यचन्द्र हड्खले र भानुको सभापतिमा रामकुमार श्रेष्ठ निर्वाचित हुनुभएकाे छ ।
संस्थापन पक्षले देवघाट गाउँपालिका, बन्दीपुर, आँबुखैरेनी र म्याग्दे गाउँपालिकामा जित हात पारेको हो । देवघाटमा तिलबहादुर थापा निर्विरोध निर्वाचित हुनुभयाे । बन्दिपुरमा कर्ण खत्री, म्याग्देमा रामभक्त घिमिरे र आँबुखैरेनीमा विष्णु पन्थ मतदानमार्फत निर्वाचित हुनुभएकाे छ ।
प्रदिप निकटले शुक्लागण्डकी नगरपालिका र घिरिङ गाउँपालिकामा सभापति जित्नुभएकाे छ। शुक्लागण्डकीमा सुरुमा संस्थापन पक्षसँगै, पौडेल र जोशीका उम्मेदवार मिलेर ७९ वर्षीय गोपीबहादुर गुरुङको नेतृत्वमा चुनावी प्यानल घोषणा गरेको थियो ।
गृहनगरमा वाइपास भएका प्रदिप निकटले पनि गोपीबहादुरलाई नै समर्थन गर्दै अन्य पदमा उम्मेदवारी दिएका थिए । गोपीबहादुर सर्वसम्मत हुनुभयाे । चुनावी मैदानमा उत्रिएको प्रदिपको प्यानलले एकछत्र जित हासिल गर्न सफल भयो । दुवै समूहले आफ्नो दाबी गरेका निर्विरोध सभापति बन्नुभएका गोपीबहादुर पनि पछिल्लो समय प्रदिप निकट रहेको बुझिएको छ ।
उहाँ पहिले पूर्वसहमहामन्त्री गोविन्दराज जोशीको गुटमा रहनुभएकाे कांग्रेसी नेताहरुले बताएका छन् । पछिल्लो समय गुरुङ शुक्लागण्डकी नगरपालिकाका मेयर किसान गुरुङ निकट मानिनुहुन्छ । पहिले रामचन्द्र पक्षमा रहनुभएका किसान अहिले प्रदिप पक्षका हुनुहुन्छ।
घिरिङ गाउँपालिकामा पनि प्रदिप निकटका यम थापा सर्वसम्मत निर्वाचित हुनुभएकाे छ । अधिवेशन हुन बाँकी भिमाद र ऋषिङमा रामचन्द्र र संस्थापन पक्षकाे अवस्थामा समान देखिन्छ ।
