धरान डर्विमा फुटसल ५ विजयी, ढुकु रेलिगेसनबाट जोगियो

पोखरा न्यूज । राष्ट्रिय ए डिभिजन लिग फुटसल प्रतियोगिता अन्तरगत बिहीबार भएको धरान डर्विको खेलमा फुटसल ५ विजयी भएको छ । पोखरा रंगशाला बहुउद्देश्यीय कभर्डहलमा भएको खेलमा द राइजिङ क्लब धरानलाई फुटसल ५ धरानले ७–५ गोल अन्तरले हराएको हो ।

खेलमा अग्रता भने राइजिङले लिएको थियो । खेलको चौथो मिनेटमा सुदिप गुरुङले गोल गर्दै अग्रता दिलाए । उनले ८ औँ मिनेटमा व्यक्तिगत दोस्रो गोल गरे । फुटसल ५ का विजय श्रेष्ठले १७ औँ मिनेटमा गोल गर्दै अग्रता घटाए । उनले २० औँ मिनेटमा व्यक्तिगत र टिमका लागि दोस्रो गोल गरे । २० औँ मिनेटमा दोर्जे तामाङले गोल गरे । पहिलो हाफमा ३–२ को अग्रता लिएको राइजिङ दोस्रो हाफमा भने सम्हालिन सकेन । २४ औँ मिनेटमा मिलन राईले गोल अग्रता दिलाए ।

उता फुटसल ५ ले ४ मिनेटमा पाँच गोल गर्दै जित हात पा¥यो । फुटसल ५ का सरोज तामाङले २ मिनेटमा ह्याट्रिक गरे । उनले खेलको ३५ औँ मिनेटमा १ तथा ३६ औँ मिनेटमा २ गोल गरे । रञ्जित गुरुङले ३७ तथा प्रवेश जोशीले ३८ औँ मिनेटमा गोल गरे । राइजिङका लागि २९ औँ मिनेटमा हेमन्त थापा मगरले गोल गरे । खेलमा २ वटा रातो कार्ड समेत देखाइयो । राइजिङका कप्तान एवम् गोलरक्षक सचिन श्रेष्ठले खेलको १९ औँ मिनेटमा रातो कार्ड पाए भने फुटसल ५ का कप्तान सन्दीप कार्कीले दोहोरो पहेँलो कार्ड खाँदै मैदान बाहिरिए ।

राइजिङका प्रशिक्षक देवेन्द्र गुरुङले रेफ्रीको सिकारमा आफूहरू सुरुदेखि नै परिरहेको प्रतिक्रिया दिए । उनले अनावश्यक रूपमा खेलाडीलाई कार्ड दिनु गलत रहेको बताए । फुटसल ५ का प्रशिक्षक विश्वास लामाले केही निर्णयबाट आफूहरू पनि आक्रोशित भए पनि पछि आफूहरूलाई कारण बताएपछि चुप भएको प्रतिक्रिया दिए । उनले आगामी यात्रा निकै कठिन भएको जानकारी दिए ।

यस्तै अर्को खेलमा लुम्बिनी फुटसललाई हराउँदै ढुकु फुटसल हब रेलिगेसनबाट जोगिएको छ । ढुकुले लुम्बिनीलाई ५–२ गोल अन्तरले हराउँदै जित हात पारेको हो । ढुकुको जितमा विक्रान्त नरसिंह राना र प्रसिद्ध मगरले २–२ तथा अभय रानाले १ गोल गरे । जितसँगै ढुकुको ७ खेलबाट ७ अङ्क रहेको छ ।

राइजिङ र फुटसल ५ धरानबिचको खेलमा विवाद
राष्ट्रिय ए डिभिजन फुटसल लिग अन्तरगत बिहीबार द राइजिङ क्लब धरान र फुटसल ५ धरानको बिच खेल चलिरहँदा रेफ्रीले गलत निर्णय दिएको भन्दै विवाद भएको छ । पहिलो हाफ सकिन केही मिनेट मात्रै वाकी रहँदा राइजिङका गोलरक्षकलाई रातो कार्ड दिए पनि विवाद भएको हो । विवादका कारण करिब १० मिनेट भन्दा बढी खेल समेत रोकिएको थियो ।

पहिलो हाफको १९ औँ मिनेटमा विजय श्रेष्ठले लामो प्रहार गर्दा राइजिङका गोलरक्षक एवम् कप्तान सचिन श्रेष्ठले जम्प गर्दै बल क्लियर गरेर ल्याण्ड गर्ने क्रममा धरानका रञ्जित गुरुङलाई घुँडाले लागेपछि सिधै रेड कार्ड दिएका थिए । यस अघि समेत १८ औँ मिनेटको खेल चलिरहँदा फुटसल ५ का कप्तान सन्दीप कार्कीले अचानक पहेँलो कार्ड पाए । यस अघि समेत पहेँलो कार्ड पाएका कारण दोहोरो पहेँलो कार्डपछि उनलाई रेड कार्ड दिइएको थियो ।

लामो विवाद पछि पुन: खेल सुचारु गरिएको थियो । तर, आयोजकले पनि आन्तरिक रूपमा रेफ्रीको निर्णयप्रति असन्तुष्टि व्यक्त गरिरहेका छन् ।

सम्बन्धित न्यूज

Leave a Reply

Your email address will not be published. Required fields are marked *

Back to top button