पोखरा न्यूज । बागलुङको काठेखोला गाउँपालिका–८ लेखानीका लक्ष्मण पुनले जीवनको १४ वर्ष विदेशी भूमि दक्षिण कोरियामा बिताए । कामदारको रूपमा कोरिया पुगेका पुनले कडा मेहनत र परिश्रम के हो भन्ने शिक्षा कोरिया बसाइले सिकायो । मेसिनको गतिमा हुने काम, काम प्रतिको लगाव, मेहनत र श्रम प्रतिको सम्मानबारे गतिलो भोगाई र सिकाई भयो ।
१४ वर्ष कोरियामा श्रम गरेर फर्किएका पुनले नेपाल फर्केर माछा पाल्न थाल्नुभएको छ । बागलुङ नगरपालिका–४ निरयघाटमा १४ रोपनी जग्गा भाडामा लिएर माछा तथा कृषी फर्म सञ्चालन गर्नुभएको छ । ६० वर्षीय पुनको दिनचार्य कृषिफर्ममा बित्ने गरेको छ ।
करिब ४५ लाख रुपैयाँ लगानी गरेर फर्म सञ्चालन गरेको पुनले जानकारी दिनुभयो । फर्म सञ्चालनको सुरुवात समुहगत रूपमा भए पनि उहाँले अहिले एक्लै थाम्नु भएको छ । विगत चार बर्षदेखि फर्म सञ्चालनमा छ ।
तीनवटा माछा पोखरीमा ग्रास, काव कमन, सिल्भर काव गरी पाँच किसिमका माछा छन् । निषेधाज्ञाको समयमा ५० हजार भुरा माछा पोखरीमा हालेको पुनले बताउनुभयो । ‘माछा उत्पादन राम्रो थियो’, उहाँले भन्नुभयो , ‘बजार उकालो लाग्ने बेला कोरोनाले असर गर्याे ।’
परिवारका अन्य सदस्यलाई आफ्नै देशमा उद्यमी बन्न प्रेरणा दिने लक्ष्यका साथ कृषी कर्मका लागेको पुनले बताउनुभयो । मासिक ५० हजारको माछा बिक्री हुन्छ ।
‘विदेशको दुःख जे भोग्नु मैले भोगे’, उहाँले भन्नुभयो , ‘अब कामको लागी कुनै पनि सदस्य विदेश जानु नपरोस् भन्ने उद्देश्य छ ।’ पुनले स्थानीय जातको कुखुरा, बट्टाई चरा, हाँससमेत व्यावसायिक रूपमा पाल्नुभएको छ । कालीगण्डकी किनारमा रहेको कृषि फर्ममा आफ्नो उत्पादनको बजारीकरण गर्न रिसोर्ट सञ्चालनको तयारी गरेको उहाँले बताउनुभयो ।
माछा पारखीहरू फर्ममै किन्न जाने गर्छन ।