पाेखरा न्यूज । पछिल्लो केही दिनयता शाहरुख खानपुत्र आर्यन खान चर्चामा छन् । उनलाई नार्कोटिक्स कन्ट्रोल ब्युरोले एक जहाजबाट ड्रग केसमा प्रकाउ गरेको थियो । उनीसहित आठजनालाई एनसीबीले पक्राउ गरेर अनुसन्धान गरिरहेको छ ।
बलिउड अभिनेता शाहरुख खानका छोरालाई छुटाउन प्रयास भए पनि अदालतमा पुगेर त्यो विफल भइसकेको छ । आर्यनसँग ड्रग्स नभेटिएको र उनले सेवन नगरेको भए पनि उनीसँगै रहेका साथीसँग भेटिएकै कारण उनी जेलमा छन् ।
सरकारी वकिलले आर्यनसहित सम्पूर्णमा एकै मुद्दा बनाएर कारबाही गरिरहेको छ । आर्यन पक्राउ परेसँगै बलिउडकर्मीले उनलाई सान्त्वना दिइरहेका छन् । विशेषत: सलमान खानले शाहरुखलाई भेटेर आवश्यक सहयोग पनि देखाइरहनु भएकाे छ । तर आमिर खान, अक्षय कुमार र अजय देवगन केही बोल्नुभएकाे छैन । त्यसो त शाहरुखसँग उहाँहरूको सम्बन्ध पनि त्यति राम्रो छैन । तर स्टार किड भएकाले उहाँहरूले आर्यनको बारेमा बोल्ने अपेक्षा हुन सक्छ ।
उहाँहरूले नबोलेको बारेमा बलिउड फिल्म, गीत र सिरिजको युट्युबमा समीक्षा गर्ने कमल राशिद खान अर्थात् केआरकेले सामाजिक सञ्जालमा लेख्नुभएकाे छ । उहाँले ‘यो बलिउड परिवार हो’ भन्दै यी अभिनेताले आर्यनको बारेमा नबोल्नुको कारण आफ्नो अनुसन्धानअनुसार प्रस्ट्याउनु भएकाे छ । आमिरले नबोल्नुकाे कारणबारे उहाँ सामाजिक सञ्जालमा लेख्नुहुन्छ, ‘आमिरले एक साथीलाई भने म शाहरुखको मित्र पनि होइन र दुश्मन पनि । त्यसैले यस विषयमा मेरो कुनै लेनादेना छैन ।’ उहाँले आमिरको यो भनाइलाई व्यंग्य गर्दै ‘यही बलिउड परिवार हो’ भनेरसमेत लेख्नुभएकाे छ ।
अजयको प्रसंगलाई पनि उहाँले सामाजिक सञ्जालमा लेख्नुभएकाे छ । ‘अजयले एक पानमसालाको विज्ञापन एक्लै छायांकन गरेका छन् । उक्त एड शाहरुखसँग थियो । शाहरुखले एड क्यान्सिल गरे पनि अजयले आफ्नो भागको छायांकन गरे । र, उनले शाहरुखको निजी समस्याको कारणले दोहोराएर विज्ञापन नगर्नेसमेत बताएका छन्,’ केआरकेले सामाजिक सञ्जालमा उल्लेख गर्नुभएकाे छ । उहाँले यसलाई पनि व्यंग्य गर्दै ‘यही त परिवार हो’ भनेर लेख्नुभएकाे छ ।
अक्षय कुमारको बारेमा पनि केआरकेले सामाजिक सञ्जालमार्फत नै आर्यनको बारेमा नबोलेको सन्दर्भलाई उल्लेख गर्नुभएकाे छ । उहाँ लेख्नुहुन्छ ,’न त म शाहरुखको विपक्षमा छु, न त उनको समर्थनमा । उनको छोराले गलत गरेका हुन् भने उनले कानुनअनुसार सजाय भोग्नु पर्छ ।’
केआरकेले सामाजिक सञ्जालमार्फत बलिउड बाहिरबाट देखिँदा एक परिवार देखिए पनि भित्रको वास्तविकता फरक रहेको सन्दर्भलाई उल्लेख गरिरहनु भएकाे छ । उहाँले कुनै अपराध पनि नगरेर आर्यनलाई २० दिनसम्म जेलमा राखिएकोप्रति रोष प्रकट गर्नुभएकाे छ । ‘कुनै अपराध नै नगरी कसरी उनलाई २० दिनसम्म जेलमा राखिएको छ ?’ उहाँले प्रश्नसमेत उठाउनु भएकाे छ । बारम्बार जमानत रद्द भएपछि आर्यनको वकिलले जमानतका लागि हाई कोर्टमा अपिल गर्ने तयारी गर्नुभएकाे छ ।
