पाेखरा न्यूज । नेकपा माओवादी केन्द्रको आठौं राष्ट्रिय महाधिवेशन कमलादीस्थित प्रज्ञा प्रतिष्ठानमा सुरु भएको छ । उदघाटनको अघिल्लो दिनसम्म माओवादीले प्रथम राष्ट्रिय सम्मेलन भन्दै आएको थियो । तर पछि एकाएक उसले महाधिवेशनमा रूपान्तरण गर्ने निर्णय गरेको थियो ।
महाधिवेशनमा माओवादीको पहिचान बोकेका नेताहरू देखिनु भएन । ०५२ सालमा माओवादी आन्दोलन सुरु हुँदा पुष्पकमल दाहाल प्रचण्डलाई मोहन वैद्य किरण, बाबुराम भट्टराई, नेत्रविक्रम चन्द विप्लव, रामबहादुर थापा बादल, टोपबहादुर रायमाझी, प्रभु साह, लेखराज भट्ट, सीपी गजुरेललगायतका साथ दिनु भएकाे थियाे । आज यी सबै नेता माओवादी केन्द्रबाट बाहिरिसक्नुभएकाे छ ।
माओवादी केन्द्रमा अध्यक्ष पदबाहेक कोही पनि स्थिर छैनन् । सबै कुनै न कुनै कारण कारबाहीमा परेका छन् । आठौं महाधिवेशनमा सहभागी हुन आएका माओवादी प्रतिनिधिहरूले १० वर्षसम्म सशस्त्र विद्रोहको नेतृत्व गरेका नेताहरू नै नदेखेपछि खल्लो महसुस गरेका छन् ।
मोहन वैद्य अहिले पनि माओवादी नाम गरेको अलग्गै पार्टीमा हुनुहुन्छ । बाबुरामले चारवटा पार्टी चाहरिसक्नुभयाे । बादल, लेखराजहरू अहिले एमालेमा हुनुहुन्छ । विप्लव नेकपा नामक पार्टीको महासचिव हुनुहुन्छ ।
