स्याङ्जामा घाँटी रेटेर बालकको हत्या, बालिका घाइते

पोखरा न्यूज । स्याङ्जा जिल्लाको वालिङमा बुधबार एक बालकको घाँटी रेटेर हत्या भएको छ ।

वालिङ नगरपालिका–१० भकुण्डेमा डेरामा बस्ने रनमाया गुरुङका १६ महिनाका छोरा साइमन गुरुङको घाँटीमा धारिलो हतियार प्रहार हुँदा ज्यान गएको प्रहरीले जनाएको छ ।

एकै घरको फरक कोठामा डेरा गरी बसेका पर्वत–५ पैंयुका ३३ वर्षीय जितेन्द्र गुरुङको आक्रमणबाट गम्भीर घाइते भएका साइमनलाई उपचारको लागि प्राथमिक स्वास्थ्य केन्द्र, वालिङ पुर्‍याइएकोमा स्वास्थ्यकर्मीले उनलाई मृत घोषणा गरेको स्याङ्जा प्रहरी प्रमुख एसपी राजीव बाबु बस्नेतले जानकारी दिनुभयो।

एसपी बस्नेतका अनुसार जितेन्द्रले मृतक बालककी पाँच वर्षीया दिदी साइना गुरुङको घाँटी र बायाँ हातमा समेत धारिलो हतियार प्रहार गरेका छन् । साइनाको अवस्था भने हाल सामान्य रहेको छ ।

प्रहरीले जितेन्द्रलाई नियन्त्रणमा लिई घटनाको बारेमा अनुसन्धान गरिरहेको जनाएको छ ।