डेङ्गी रोगको प्रकोप फैलिएको भन्दै पोखरा महानगरले मुख्य आवास क्षेत्रमा रहेका कवाडी संकलन केन्द्र कम्तिमा ५०० मिटर दुरी भन्दा पर सार्न ३५ दिने सुचना जारी गरेको छ ।
आज महानगरले प्रकाशित गरेको सुचना अनुसार कवाडी संकलन केन्द्रबाट डेङ्गी लगायत विभिन्न महामारी आवास क्षेत्रमा फैलिन मद्दत पुगेको हुनाले त्यस्ता व्यवसाय अब आवास क्षेत्र भन्दा कम्तिमा ५०० मिटर पर स्थापना गर्नुपर्नेछ । महानगरले त्यस्ता कवाडी व्यवसाय सञ्चालन गरिएका घर जग्गाका धनीलाई पनि कवाडी सञ्चालनका लागि जे जस्तो सम्झौता भएपनि त्यसलाई संशोधन गर्न निर्देशन दिएको छ ।
सुचना प्रकाशित भएको ३५ दिन भित्र त्यस्ता कवाडी निर्देशन बमोजिम नसारिए घर जग्गा धनी र कवाडी व्यवसायी दुवैलाई कारवाही हुने चेतावनी पनि महानगरले दिएको छ । महानगरले कवाडी संकलन केन्द्र, गोदाम, घर तथा व्यवसाय वरपर पानी जम्ने खाल्डा, खुला ड्रम, टिनका भाँडा, टायर, गमला जस्ता पानी जम्ने स्थान खोजी गरेर नष्ट गर्न पनि महानगरवासीलाई अनुरोध गरेको छ ।
पछिल्लो समय व्यापक फैलिएको डेङ्गीका बिरामी देशभर १२ हजार नाघिसकेका छन् भने ११ जनाको मृत्यु पनि भइसकेको छ । डेङ्गीका लामखुट्टे सफा पानी जम्ने स्थानमा प्रजनन गर्ने हुँदा त्यस्ता पानी जम्ने स्थान नष्ट गर्न महानगरले अभियान चलाएको हो ।
सुचना :