पाँचौँ सृजना कप भलिबलका फाइनल खेलहरु आज हुने भएका छन् । आज हुने छात्रातर्फको फाइनलमा साविक विजेता शान्ता मावि र कन्या माविबीच प्रतिस्पर्धा हुने भएको छ। यसैगरी छात्रतर्फ राष्ट्रिय मावि र ब्रम्हरुपा माविबीच उपाधि भिडन्त हुने भएको छ ।
सृजना विकास केन्द्र र कास्की जिल्ला भलिबल संघको संयुक्त आयोजनामा पोखरा रंगशालामा बिहीबार छात्रातर्फ पहिलो सेमिफाइनलमा शान्ताले जनप्रियलाई २५-१७, २२-२५ र २५–१७ सेटमा पराजित गर्यो । कन्या र इन्द्रराज्यलक्ष्मीबीच दोस्रो सेमिफाइनलमा कन्या सोझो सेटमा विजयी हुँदै उपाधि नजिक पुगेको हो । जसमा २५-८ र २५-८ सेट निस्केको थियो ।
छात्रतर्फ राष्ट्रिय र जनप्रियबीच पहिलो सेमिफाइनलमा राष्ट्रियले २५-१२ र २५-१९ सेटमा जीत हात पार्यो । दोस्रो सेमिफाइनल ब्रम्हरुपा र शान्ता माविबीच भएकोमा ब्रम्हरुपा खेल जित्दै फाइनल पुगेको हो । जसमा २५-२०, १८-२५ र २५-२२ गरी २-१ सेटमा हराएको हो । छात्रतर्फ फाइनल शुक्रबार मध्यान्ह १२ बजे हुनेछ । त्यसअघि छात्रातर्फको फाइनल तथा तेस्रो स्थानका खेल हुने रेफ्री संयोजक गोपाल थापाले बताए ।
बिहीबार नै छात्रतर्फ प्रिक्वाटरमा जनप्रियले राष्ट्रिय माविलाई २-१ सेटमा हराउँदै मेश्रम वराहसँग चौथो क्वारफाइनल खेलेको हो । जसमा जनप्रियले मेश्रमलाई २-१ सेटमा पराजित गरेको थियो । गोगनले सीतारामलाई २–१ सेटमै पाखा लगाउँदै राष्ट्रिय माविको दोस्रो टिमसँग पहिलो क्वारफाइनल सुनिश्चित गरेको थियो । तर राष्ट्रिय माविले गोगनको चुनौती २५–१६, १८–२५ र २५–२२ पन्छाउँदै सेमिफाइनल पुगेको थियो ।
त्यस्तै, प्रिक्वाटरमै ब्रम्हरुपाले वाराहीलाई सोझो सेटमा हराउँदै भगवतीसँग तेस्रो क्वाटरफाइनल खेलेकोमा सोझो सेटमा जीत निकाल्दै अन्तिम चारमा पुगेको थियो ।
तालवाराहीले शान्तालाई दोस्रो क्वार्टरफाइनलमा २५–१८, २७–२५ मा हराए पनि प्रोटेस्ट परेपछि शान्ता अन्तिम चारमा पुगेको हो ।
सृजना विकास केन्द्र अध्यक्ष कृष्णबहादुर थापाले विद्यार्थीको भलिबल प्रतिभा प्रष्फुटनमा प्रतियोगिताले सघाउ पुग्ने बताए । छात्रछात्रा दुवैतर्फ विजेतालाई १-१ लाख, उपविजेतालाई ६०-६० हजार र तृतीय हुने विद्यालयलाई ३५-३५ हजारसहित शिल्ड, मेडल र प्रमाणपत्र प्रदान गरिने छ ।
सर्वोत्कृष्ट छात्रछात्रालाई जनही ५ हजार र अन्य ६ विधाका उत्कृष्ट खेलाडीलाई पुरस्कृत गरिनेछ । उत्कृष्ट प्रशिक्षकले ५ हजार पाउने प्रचार संयोजक इन्द्रप्रसाद पौडेलले बताए । प्रतियोगितामा छात्रतर्फ ३० र छात्रातर्फ १५ टिमले भाग लिएका थिए ।
