पोखरा, २० फागुन । पोखराको फेवातालमा डुङ्गा पल्टिदा एक महिलाको ज्यान गएको छ । शनिबार अपराह्न ४ बजे भएको घटनामा पोखरा -१ बगर निवासी ७० वर्षीया याम माया गिरीको ज्यान गएको हो ।
डुङ्गा पल्टिएपछि गम्भीर अवस्थामा उद्धार गरिएकी गिरीलाई हस्पिटल लगिएकोमा चिकित्सकले उपचारको क्रममा मृत घोषणा गरेको कास्की प्रहरी प्रवक्ता डिएसपी श्रवण कुमार विकले जानकारी दिए।
वडा प्रहरी कार्यालय बैदामका प्रहरी प्रमुख, डिएसपी वेद जोशीका अनुसार शनिबार अचानक आएको हावाहुरीका कारण ६ जना सवार डुङ्गा पल्टिएकोमा अन्य ५ जना सकुशल रहे पनि डुङ्गा मुनि परेकी गिरीलाई गम्भीर अवस्थामा उद्धार गरिएको थियो ।
डिएसपी जोशीले भने, ‘डुंगामा एकै परिवारका छ जना सवार रहेकोमा अन्य पाँच जना सकुशल हुनुहुन्छ । डुंगाको मुनि पर्नुभएकी याम माया गिरीलाई प्रहरीसहितको टोलीले गम्भीर अवस्थामा उद्धार गरेर हस्पिटल लगेको हो। ’ डुंगामा सवार पाँच जनालाई सामान्य अवस्थामा उद्धार गरिएको हो ।
शनिबार नै तालमा कायाक गरेका चार जना समेत दुर्घटनामा परेका थिए । उनीहरूलाई एपीएफको टोलीले तत्कालै सकुशल उद्धार गरेको छ ।
