राष्ट्रिय मावि पोखराको हीरक महोत्सव सुरु

पोखरा । राष्ट्रिय मावि पोखराको हीरक महोत्सव बुधबारदेखि सुरु भएको छ । सो अवसरमा विद्यालय शिलान्यासस्थल पोखरा–३, नदीपुर नारायणस्थानबाट प्रभातफेरी भयो ।

प्रभातफेरी पालिखेचोक, तेर्सापट्टी, नालामुख, भैरवटोल, विन्ध्यवासिनी, बागबजार हुँदै विद्यालय पुगी शुभारम्भ समारोहमा परिणत भयो ।

कार्यक्रम उद्घाटन गर्दै गण्डकी प्रदेश सरकारका मुख्यमन्त्री सुरेन्द्रराज पाण्डेले नेपाली जनताको आधारभूत आवश्यकतामा पर्ने शिक्षा र स्वास्थ्य सेवाप्रतिको जिम्मेवारी सरकारले पूरा गर्ने बताए ।

“जुनसुकै पार्टीको सरकार भए पनि शिक्षा र स्वास्थ्य सेवाबाट हात झिक्न मिल्दैन”, उनले भने, “नेपालको संविधानले आधारभूत आवश्यकतामा राखेको शिक्षा र स्वास्थ्य क्षेत्रमा लगानी बढाउँदै जानुपर्छ ।”

शिक्षा ऐन संशोधनका बारेमा संसदीय समितिमा छलफल चलिरहेको बताउँदै उनले शिक्षा र स्वास्थ्य क्षेत्र आमनेपाली जनताको हितमा हुनुपर्नेमा जोड दिए ।

सामुदायिक विद्यालयमा विद्यार्थी किन आकर्षित भएनन् भन्नेबारेका कारण खोज्न जरुरी भएको बताउँदै १२ कक्षा पास गरेपछि पढ्नका लागि विदेश जाने विद्यार्थीको सङ्ख्या घटाउनेतर्फ सरकार लाग्नुपर्ने उनको भनाइ छ ।

“सामुदायिक विद्यालयको व्यवस्थापनको जिम्मा कुन तहको सरकारले लिने भन्नेबारेमा अन्योलता कायमै रहेकाले त्यसतर्फ केन्द्र सरकारको ध्यान जान जरुरी छ”, मुख्यमन्त्री पाण्डेले भने, “विधयेकको छलफलमा पनि स्पष्ट किटान गर्नुपर्छ ।”

नेपालका राजनीतिक दलहरुले नेपालमै रोजगारी सिर्जना र स्वरोजगारको वातावरण निर्माण गरी विदेश जाने युवा जनशक्तिलाई नेपालमै खपत गर्नुपर्नेमा उनको जोड छ ।

वर्तमान राजनीतिक अवस्थाका बारेमा मुख्यमन्त्री पाण्डेले प्रदेश सरकारका कानुन नबन्दा अधिकारविहीन हुनुपरेको बताउँदै बनेका कानुन पनि कार्यान्वयनमा आउन नसकेको दुखेसो गरे ।

प्रतिनिधिसभा सदस्य दामोदर पौडेल (वैरागी) ले जनताको आधारभूत आवश्यकतामा पर्ने शिक्षा र स्वास्थ्य सेवा निजी क्षेत्रको जिम्मा लगाउन नहुने बताए । सामुदायिक विद्यालयमा शिक्षक दरबन्दी वृद्धि गरी गुणस्तरीय शिक्षा प्रदान गर्न जरुरी भएको भनाइ उनको थियो ।

पूर्वविद्यार्थी तथा नेपाल उद्योग वाणिज्य सङ्घका पूर्वअध्यक्ष आनन्दराज मुल्मीले सामुदायिक विद्यालयबाट प्रदान गरिने शिक्षालाई गुणस्तरीय बनाउन यस क्षेत्रका सबै अभिभावकको दायित्व हुने बताए ।

राणा शासनको अन्त्य हुनुभन्दा एक वर्षअघि विसं २००६ मा स्थापना भएको उक्त विद्यालयले गुणस्तरीय शिक्षा प्रदान गर्नेतर्फ आफ्ना पाइला अगाडि बढाउनुपर्नेमा जोड दिए ।

एक हजार चार सय विद्यार्थी अध्ययनरत उक्त विद्यालयका ५७ जना शिक्षकमध्ये २८ जना निजी स्रोतकै रहेको जानकारी विद्यालयका प्रधानाध्यापक ईश्वरी सापकोटाले दिए ।

सो अवसरमा विद्यालयलाई ७२ रोपनी जग्गा प्रदान गर्ने स्थानीय पराजुली परिवार, विद्यालय स्थापनामा योगदान गर्ने व्यक्तिका परिवारका सदस्यलाई सम्मानसमेत गरिएको थियो ।

२००६ मंसिर २० मा पब्लिक मिडिल स्कुल नामबाट स्थापित विद्यालय हालको राष्ट्रिय मावि हो । विद्यालयले २००७ सालमा स्थायी स्वीकृति प्राप्त गरेको थियो । नदीपुरमा भवनको जग खन्ने क्रममा जमिन भासिएपछि विद्यालय हाल पोखरा-१, पुरानो टुँडीखेलमा सारिएको हो ।

विद्यालय भवन निर्माणमा तत्कालीन सरकार तथा अमेरिकी सहायता नियोगबीच भवन निर्माण सम्झौता भएकोमा २०१३ सालमा राजा महेन्द्रले शिलान्यास गरेका थिए ।

महोत्सवअन्तर्गत पुनर्मिलन समारोह, स्मारिका प्रकाशन, स्वास्थ्य शिविर, कला साहित्य र खेलकुदका विभिन्न जिल्लास्तरीय प्रतियोगिता मुख्यरुपमा समेटिने विद्यालयले जनाइएको छ ।

विद्यालय व्यवस्थापन समिति अध्यक्ष राणाको अध्यक्षतामा भएको उक्त कार्यक्रममा उपाध्यक्ष शिवप्रसाद पराजुलीले स्वागत र सहायक प्रअ शिवभक्त देवकोटाले कार्यक्रम सञ्चालन गरेका थिए ।

सम्बन्धित न्यूज

Leave a Reply

Your email address will not be published. Required fields are marked *

Back to top button