पोखरा । सुर्खेतमा जारी ३४औँ राष्ट्रिय पुरुष भलिबल प्रतियोगितामा गण्डकी प्रदेश सेमिफाइनल प्रवेश गरेको छ ।
गण्डकीले फाइनल प्रवेशका लागि अब समूह ‘ए’ को विजेता सशत्र प्रहरी (एपीएफ) को सामना गर्नेछ । सेमिफाइनल खेल बुधबार हुनेछ ।
गण्डकी यसअघिका खेलेका ४ मध्ये ३ खेल जितेर सेमिफाइनल पुगेको हो । गण्डकी आर्मीसँग भने सोझो सेटमै पराजित भएको थियो । एपिएफ समूहका सबै खेल जितेर समूह विजेता बनेको हो ।
गण्डकी र एपिएफसँगै नेपाल आर्मी र पुलिस क्लब सेमिफाइनलमा पुगेका छन् । बुधबार नै हुने अर्को सेमिफाइनलमा आर्मीले पुलिसको सामना गर्नेछ ।
बुधबार पहिलो र दोस्रो चरणमा हुने सेमिफाइनलका दुई विजेता टोली फाइनल खेलका लागि छनोट हुनेछन् ।
फाइनल खेल बिहीबार हुनेछ । प्रतियोगिताबाट कोशी, मधेस, बागमती, लुम्बिनी, कर्णाली र सुदूरपश्चिम प्रदेश बाहिरिएका छन् ।
