पोखरामा बगर भाइखलक भेट्रान फुटवल : तीन विधामा ३६ टीम भिड्दै

पोखरा । पोखरामा शनिबारदेखि दोस्रो हिमालयन ब्रुअरी तथा १३औँ बगर भाइखलक अन्तर्राष्ट्रिय भेट्रान फुटवल प्रतियोगिता हुँदैछ ।

बगर भाइ खलकको आयोजनामा हुने प्रतियोगितामा तीन विधामा ३६ टीमले प्रतिस्पर्धा गर्ने भएका छन् । संस्थाका अध्यक्ष दिलबहादुर गुरुङका अनुसार प्रतियोगिताको सबै तयारी पूरा भएको छ ।

भेट्रान खेलाडीलाई लक्षित गर्दै यो वर्षदेखि तीन विधामा प्रतियोगिता गर्न लागिएको अध्यक्ष गुरुङ्गले बताए । उनका अनुसार यसपटक ४० वर्षमाथि, ५० वर्षमाथि र ६० वर्षमाथि गरि तीन उमेर सहुमा प्रतियोगिता हुनेछन् ।

‘हामीले यस पटक तीन उमेर समूहको प्रतिस्पर्धा गर्दैछौँ । प्रतियोगिताको मुख्य उद्देश्य भनेको ग्रासरुट फुटबल खेलाडी उत्पादन गर्नु हो’, उनले भने ।

‘ग्रासरुटको विकासमा बुढाहरुको फुटवल किन भनियो भने बुढाहरु त खेल्दारहेछन् हामी पनि खेल्नुपर्छ भन्ने भावना जगाउन भेट्रान फुटबलको आयोजना गरेका हौं’, उनले भने ।

सोही अवसरमा संस्थाले फुटबल खेल विकासमा विशेष योगदान दिने पूर्व राष्ट्रिय खेलाडी सम्मानबाट यसपटक शम्भु केसीलाई सम्मानित गर्ने भएको छ । राखेपका पूर्व प्रशिक्षकसमेत रहेका केसी वरिष्ठ प्रशिक्षक हुन् ।

प्रतियोगितामा ४० वर्षमाथि उमेर समूहको विजेताले दुई लाख, उपविजेताले एक लाख रुपैयाँ पुरस्कार प्राप्त गर्नेछन् ।

यसैगरी सर्वोत्कृष्ट खेलाडीले १५ हजार तथा उत्कृष्ट गोलरक्षक, डिफेन्डर, मिडफिल्डर, फरवार्ड र प्रशिक्षकले जनही ५ हजार रुपैयाँ प्राप्त गर्नेछन् । ४० वर्षमाथिमा २३ टीमले प्रतिस्पर्धा गर्नेछन् ।

यता, ५० वर्षमाथि उमेर समूहको विजेताले एक लाख र उपविजेताले ५० हजार रुपैयाँ पुरस्कार प्राप्त गर्नेछन । ५० वर्षमाथिमा ९ टिमको सहभागिता रहेको छ ।

यसैगरी ६० वर्षमाथिको विजेताले ५० हजार र उपविजेताले ३० हजार रुपैयाँ पुरस्कार प्राप्त गर्नेछन् । उक्त विधामा ४ टिमको सहभागिता रहेको छ ।

प्रतियोगितालाई हिमालयन ब्रुअरी प्रालिले मुख्य प्रायोजना गरेको छ । प्रतियोगितामा पोखरासहित भारतको देहरादून, काठमाडौं, ललितपुर, चितवन, सिराहा, हेटौँडा, सर्लाही, बुटवल, सिमरा, कैलाली, पाँचथरबाट सहभागिता रहेको छ ।

सम्बन्धित न्यूज

Leave a Reply

Your email address will not be published. Required fields are marked *

Back to top button