पोखराबाट अन्तर्राष्ट्रिय उडान सुचारु गर्न दवाव, आज सार्वजनिक सभा

पोखरा । पोखरा अन्तर्राष्ट्रिय विमानस्थलबाट अन्तर्राष्ट्रिय उडान सुचारु गराउन दबाब दिने उद्देश्यले आज पोखरामा सार्वजनिक सभा आयोजना गरिएको छ । सभा पोखराको पृथ्वीचोकमा दिउँसो २ बजे हुनेछ ।

राष्ट्रिय नागरिक अभियान कास्की र स्वतन्त्र पत्रकार संघ कास्कीले सभा आयोजना गरेको हो ।

अभियानका संयोजक विनय यादवले पोखरावासीको ठूलो लगानी, सिङ्गो पोखराको गौरवको योजना निर्माण भएर सञ्चालनमा आइसक्दा पनि अन्तर्राष्ट्रिय उडानका लागि राज्य निदाएकाले ब्यूँझाउन सभा आयोजना गरिएको बताए ।

सभाको मुख्य उद्देश्यबारे प्रकाश पार्दै उनले थपे, ‘पोखरा अन्तर्राष्ट्रिय विमानस्थललाई पूर्णरूपमा सञ्चालन गर, वीआरआइ. ऋणलाई अनुदानमा परिणत गर, विमानस्थल निर्माणमा भ्रष्टाचार छ भने छानविन गर योबाहेक कार्यक्रमको अर्को उद्देश्य छैन ।’

सभामा नेपाल उद्योग वाणिज्य महासंघका पूर्वअध्यक्ष आनन्दराज मुल्मी, अग्रज पत्रकार युगनाथ शर्मा पौडेल, नेपाल पत्रकार महासंघ कास्की अध्यक्ष विमला भण्डारी र पर्यटनविज्ञ वासुदेव त्रिपाठी वक्ताका रूपमा रहेको स्वतन्त्र पत्रकार संघ कास्कीका अध्यक्ष असफल गौतमले जानकारी दिए ।

सभापछि वक्ताबाट आएका धारणा र समग्र पोखराबासीबाट संकलन गरिएका सुझावलाई सरोकारवाला निकायलाई बुझाइने आयोजक संस्थाले बताएको छ । अभियानका लागि महिलाको संयोजन सामाजिक अभियान्ता ईन्दिरा अधिकारीले गरेकी छन् ।

सभामा पोखराका सबै क्षेत्रका प्रतिनिधिलाई आमन्त्रण गरिएको र उनीहरूबाट सुझाव मात्र संकलन गरिने अभियानका सदस्य सुनिल धामी बताउँछन् ।

अभियानले यसअघि पोखराको सभागृहबाट पृथ्वीचोकसम्म दबाब र्‍यालीसमेत आयोजना गरेको थियो ।