पोखरा । दोस्रो एकदिवसीय क्रिकेट प्रतियोगितामा नेपाल विजयी भएको छ । आज सम्पन्न प्रतिस्पर्धामा नेपाल ‘ए’ ले क्यानडा-११ लाई दुई विकेटले पराजित गरेको छ ।
नेपालले जितका लागि २ सय ४१ रनको लक्ष्य पाएको छ । सो लक्ष्य नेपालले अन्तिम ओभरको ५ बल बाँकी छँदा ८ विकेट गुमाएर भेट्टायो ।
नेपाललाई जिताउन कप्तान सन्दीप जोरा र बसिर अहमदले अर्धशतकीय पारी खेले । ७४ बलमा सन्दीपले ७ चौका र १ छक्काको मद्दतमा ६६ रन बनाए ।
त्यसअघि टस हारेर पहिले ब्याटिङ गरेको क्यानडा-११ ले ४९ दशमलव ५ ओभरमा सबै विकेट गुमाउदै २ सय ४० रनको योगफल बनाएको थियो ।
क्यानडाका लागि श्रेयास मोम्भाले सर्वाधिक ६८ रनको योगदान दिए । उनले ८२ बल खेल्न क्रममा ५ चौका प्रहार गरे ।
यस्तै नवनित दलिवालले ४६, श्रीमन्था विजयरत्नेले ४१ र आरोन जोनसनले ३६ रनको योगदान दिए । डिलोन हेलिगरले १६ रन बनाए ।
बलिङतर्फ नेपालका साहब आलमले ३ विकेट लिए भने शेर मल्ल र रासिद खानले समान २/२ विकेट लिए । त्यसैगरी सागर ढकाल र बसिर अहमदले समान १/१ विकेट लिए ।
यो रोमाञ्चक जितसँगै नेपाल ‘ए’ ले ३ खेलको शृंखलालाई १-१ को बराबरीमा ल्याएको छ ।
पहिलो खेलमा नेपाल क्यानडा-११ सँग ४ विकेटले पराजित भएको थियो । शृंखलाको तेस्रो तथा अन्तिम खेल बिहीबार हुनेछ ।
