काठमाडौँ । आईसीसी विश्वकप लिग-२ क्रिकेट अन्तर्गत काठमाडौँमा जारी श्रृंखलाको अन्तिम खेलमा नेपालले अहिले नेदरल्याण्ड्ससँग खेल्दैछ । त्रिभुवन विश्वविद्यालयको किर्तिपुरस्थित मैदानमा नेपालले टस हारेर पहिले ब्याटिङ गर्दैछ ।
त्रिदेशीय श्रृंखलामा नामिबियाले ३ जितबाट ६ अंकसहित शीर्ष स्थान हासिल गरेको छ । नामिबियाले लिग-२ को पहिलो श्रृंखला पनि जितेको छ ।
त्यसैगरी नेपाल र नेदरल्याण्ड्सको समान २ अंक छ । आजको खेल जित्ने टिमको ४ अंक हुनेछ र तालिकाको दोस्रो स्थानमा रहने छ ।
नेपाल र नेदरल्याण्डसबीच अहिलेसम्म केवल चार एक दिवसीय खेल भएका छन् । जसमा नेदरल्याण्ड्सले २ तथा नेपालले २ खेल जितेको छ ।
नेपालले आफ्नो पहिलो एक दिवसीय अन्तर्राष्ट्रिय खेल नेदरल्याण्ड्ससँग नै २०१८ को अगस्त १ मा खेलेको थियो ।
यसै श्रृंखलामा नेपालले नेदरल्याण्ड्समाथि फराकिलो जित हासिल गरेका कारण आजको खेलमा पनि नेपाल हावी हुने देखिन्छ ।
