नवलपुर । दूधको भुक्तानी नपाएको र सरकार मुकदर्शक भएर बसेको भन्दै त्यसको विरोधमा पूर्वी नवलपरासीका दुग्ध किसान आन्दोलित भएका छन् ।
उनीहरुले बिहीबार कावासोतीमा सडकमा दूध पोखेर पूर्वपश्चिम राजमार्गमा १ घण्टा चक्काजाम गरे ।
सदरमुकाम कावासोतीस्थित जिल्ला प्रहरी कार्यालय अगाडि राजमार्गमा दूध पोखेर किसानले सरकारविरुद्ध आक्रोश पोखे ।
कृषिमन्त्री राजीनामा दे, किसानमारा सरकार मुर्दावाद, दूधको आयात बन्द गर जस्ता नाराअंकित प्ले कार्ड बोेकेको किसानले नारावाजी गरेका थिए ।
उनीहरुले ‘मिल्क होली डे’ बन्द हुनुपर्ने र किसानको उत्पादन दूधको मूल्य र बिक्री जिम्मा सरकारले लिनुपर्ने माग गरेका छन् ।
दूध पोखेर नारावाजी गरेका कारण महेन्द्रराजमार्ग हुँदै पूर्वपश्चिम हिंडेका सयौं गाडी कावासोतीमा रोकिएका थिए ।
पूर्वी नवलपरासीमा दैनिक करिब ७० हजार लिटर दूध बिक्री हुँदै आएको छ ।
दुग्ध उत्पादक किसानले स्थानीय सहकारी मार्फत बिक्री गरेको दूधको भुक्तानी नपाएका कारण आन्दोलन गर्नुपरेको जनाएका छन् ।
सहकारीले काठमाडौंका दूध डेरीलाई दिएको दूधको भुक्तानी नपाएका कारण किसान मारमा परेका हुन् ।
