पोखराको प्रतिभा माविका उत्कृष्ट विद्यार्थी पुरस्कृत

पोखरा । पोखरास्थित प्रतिभा माविले विद्यालयमा भएका विभिन्न शैक्षिक तथा खेलकुद गतिविधिका उत्कृष्ट विद्यार्थीलाई पुरस्कृत गरेको छ । कक्षा ४ देखि १२ सम्मका विद्यार्थीले विद्यालयमा भएका विभिन्न प्रतियोगितामा प्रतिस्पर्धा गरेका थिए । उनै प्रतिस्पर्धाका विद्यार्थीलाई पुरस्कृत गरिएको हो ।

कार्यक्रममा विद्यालय संचालक समिति अध्यक्ष नारायणप्रसाद पौडेल तथा राष्ट्रिय परीक्षा बोर्ड गण्डकी प्रदेश प्रमुख लक्ष्मण देवकोटा, विद्यालयका प्राचार्य किरण सापकोटासहित विद्यालय सञ्चालक तथा शिक्षकहरुले विद्यार्थीलाई पुरस्कार वितरण गरेका थिए ।

विद्यालयले यो वर्ष विज्ञान प्रदर्शनी, बिजनेस प्लान प्रेजेन्टेसन, फुड फेस्टिबल तथा विभिन्न खेलकुद कार्यक्रम आयोजना गरेको थियो । ती शैक्षिक गतिविधि र खेलकुद प्रतियोगितामा उत्कृष्ट र सहभागी विद्यार्थीलाई एकैसाथ पुरस्कृत गरिएको थियो ।

कार्यक्रममा प्राचार्य किरण सापकोटाले विद्यालयले विद्यार्थीको क्षमता अभिवृद्धि गराउन वर्षेनी नियमित शैक्षिक र खेलकुदका कार्यक्रम गर्दै आएको बताए । उनले आगामी वर्ष पनि यस्तै गतिविधिले निरन्तरता पाउने जानकारी पनि दिए ।

‘विद्यार्थीमा लुकेको अदुभूत क्षमतालाई यस्तै गतिविधिमार्फत बाहिर ल्याउने हो,’ सापकोटाले भने, ‘प्रतिभाले विद्यार्थीलाई कितावी ज्ञानको साटो प्रयोगात्मक र व्यावहारिक सीप पनि सिकाउँछ । विद्यार्थीमा लुकेको क्षमता बाहिर ल्याउन पनि उत्तिकै प्रयास गर्छ ।’

विद्यालयमा यो पटक बास्केटबल, भलिबल, टेबलटेनिस, ब्याडमिन्टन, फुटसल, चेससहितका खेल गतिविधि भएका थिए । विद्यार्थीले विभिन्न समूह बनाएर आन्तरिक रुपमा प्रतिस्पर्धा गरेका थिए । यस्तै, गणित क्वीज, वक्तृत्वकला लगायतका प्रतिस्पर्धा पनि भएको थियो ।

राष्ट्रिय परीक्षा बोर्ड गण्डकी प्रदेश प्रमुख लक्ष्मण देवकोटले विद्यालय शिक्षामा संस्थागत विद्यालयको योगदान महत्वपूर्ण रहेको बताए । उनले संस्थागत विद्यालयले तारिफयोग्य योगदान दिएकै कारणले शैक्षिक क्षेत्रको प्रगति भएको पनि बताए ।

उनले वर्षभरी विद्यालय भित्र विभिन्न शैक्षिक तथा खेलकुदका गतिविधि गरेर विद्यार्थीमा लुकेको क्षमता बाहिर ल्याउन संस्थागत विद्यालयको भूमिका रहेको बताए । ‘विद्यार्थीमा अन्तरनिहीत खुबी पहिचान गर्न यस्ता गतिविधिले सघाउँछ,’ देवकोटाले भने, ‘विद्यार्थीलाई किताबको कोर्ष पढाएर मात्र हुँदैन अरु शैक्षिक गतिविधि गरेर उनीहरुमा लुकेको क्षमता बाहिर ल्याउनुपर्छ ।’ उनले समुदायमा शिक्षाको पहुँच पुगेको तर अब गुणस्तर कायम गर्नु जरुरी रहेको बताए ।

पछिल्लो समय शैक्षिक वा रोजगारीको सिलसिलामा नेपाल बाहिर जाने युवाको आकार बढेकोले नेपालको शिक्षा व्यावहारिक नभएको हो की भन्ने जिज्ञाशा उठेको पनि उनले बताए ।

‘कक्षा १२ पछि बिदेशमा भेटौला भन्ने गरिएको छ । सबैको बिदेश प्रतिको मोह बढेको छ । बेलैमा बिचार नगर्ने हो भने विद्यार्थी अभाव अझै हुनेछ,’ उनले भने, ‘शिक्षालाई व्यावहारिक बनाउने हो भने विदेश जाने क्रम केही कम गर्न सकिन्छ ।’

विद्यालय संचालक समितिका अध्यक्ष नारायणप्रसाद पौडेलले विद्यालयले वार्षिक रुपमा क्यालेन्डर नै बनाएर विभिन्न गतिविधि गर्दै आएको बताए । ‘विद्यार्थीले आफ्नो क्षमता देखाउने अवसर ती प्रतिस्पर्धालाई बनाएका थिए । विद्यार्थीका ती योजना, रचना र सिर्जना निकै नै चाखलाग्दा थिए । आगामि दिनमा पनि यस्तै कार्यक्रम गरेर विद्यार्थीको क्षमता बाहिर ल्याउने प्रयास हुनेछ,’ उनले भने ।

अध्यक्ष पौडेलका अनुसार विज्ञान प्रदर्शनी, विजनेस प्लान प्रेजेन्टसन र फुड फेस्टिबलमार्फत विद्यार्थीले क्षमता देखाएका थिए । ‘बिजनेस प्लान प्रेजेन्टेसन यति आकर्षक थियो की विद्यार्थीले प्रस्तुत गरेको क्षेत्र नै भविष्यमा व्यवसाय गर्नका लागि काफी थियो,’ उनले भने ।

सम्बन्धित न्यूज

Leave a Reply

Your email address will not be published. Required fields are marked *

Back to top button