पोखरा-१३ की खुस्बु जनकपुरधामको होटलमा मृत फेला

पोखरा । पोखराकी एक युवती जनकपुरधामको एक होटलमा मृत भेटिएकी छन् ।

मृतक पोखरा महानगरपालिका वडा नं. १३ की अन्दाजी २९ वर्षकी खुस्बु सुनार रहेकी छन् ।

जिल्ला प्रहरी कार्यालय धनुषाका निमित्त सूचना अधिकारी प्रहरी निरीक्षक उपेन्द्र खरेलका अनुसार जनकपुरधामको रामानन्दचोकस्थित सुनार सिटी होटलको कोठामा आज बिहान ८ बजे उनी बेहोस अवस्थामा भेटिएकी थिइन् ।

उनलाई तत्कालै उपचारका लागि प्रादेशिक अस्पताल जनकपुरमा लगिएकोमा ८ः३० बजे चिकित्सकले मृत घोषणा गरेको इन्स्पेटर खरेलले जानकारी दिए ।

युवतीको शव पोस्टमार्टमका लागि सोही अस्पतालमा राखिएको छ । उनको मृत्युको कारण खुल्न नसकेको र अनुसन्धान भइरहेको प्रहरीले जनाएको छ ।