पोखरा । नेपाल खानेपानी संस्थान पोखरा शाखाअन्तर्गत विन्ध्यवासिनी इकाईको आफ्नै भवन बन्ने भएको छ ।
कुल दुई करोड ३५ लाख ८८ हजार रुपैयाँको लागतमा भवन बन्न लागेको हो ।
भवन २०८१ को भदौ महिनासम्ममा निर्माण सम्पन्न हुने लक्ष्यसहित निर्माणको जिम्मा बलदेव एकता जेभीले पाएको छ ।
संस्थानको विन्ध्यवासिनी इकाई कार्यालय भाडा घरबाट सञ्चालित छ ।
भवनको शनिबार संस्थानको पोखरा शाखाका कार्यालय प्रमुख आशिष कार्कीले शिलान्यास गरे । सो अवसरमा उनले भवन बनेसँगै उपभोक्तालाई सेवा सहज बन्ने विश्वास व्यक्त गरे ।
हाल भाडामा बसेको भवनबाट प्रभावकारी सेवा दिन नसकेको स्वीकार गर्दै उनले आधुनिक र सुविधासम्पन्न भवन बनाउन लागिएको जानकारी दिए ।
सो कार्यालयले पोखरा महानगरपालिका वडा नं १, २, ३, ४, ११, १२, १६, १८ र १९ वडामा करिब १३ हजार धारामार्फत सेवा दिएको छ ।
