डुम्रे-बेँसीसहर सडक एकतर्फी सञ्चालन

पोखरा । डुम्रे-बेँसीसहर सडक एकतर्फी सञ्चालनमा आएको छ । बेँसीसहर नगरपालिका वडा नं. १ दलालमा आज बिहान पहिरो खस्दा सडक अवरुद्ध बनेको सो सडक दिउँसो १२ बजदेखि एकतर्फी सञ्चालनमा आएको हो ।

सडक दुईतर्फी नै खुलाउने प्रयास भइरहे पनि पहिरो पनि निरन्तर खसिरहेकाले सम्भव नभएको जिल्ला प्रहरी कार्यालयका सूचना अधिकारी तथा प्रहरी निरीक्षक थानेश्वर चपाईँले जानकारी दिए ।

सडक सुचारु भएपछि लमजुङबाट पोखरा, काठमाडौँ तथा चितवन, भैरहवालगायत स्थान जाने आउने र बेँसीसहरतर्फको सवारी गन्तव्यतर्फ लागेको इन्स्पेक्टर चपाइँले बताए । यसअघि यही असार ४ गते पनि पहिरो खस्दा सडक अवरुद्ध भएको थियो ।