कालीगण्डकी किनारबाट ७ वर्षीय बालक बेपत्ता, यस्तो छ घटनाक्रम

पोखरा । कालीगण्डकी नदी किनारबाट म्याग्दीका एक बालक बेपत्ता भएका छन् । बेपत्ता हुनेमा रघुगंगा गाउँपालिका-१ तिप्ल्याङका ७ वर्षीय अधिव अधिकारी छन् ।

गण्डकी प्रदेश प्रहरी कार्यालय पोखराका अनुसार सोमबार ११ः१५ बजे ती बालक कालीगण्डकी किनारबाट बेपत्ता भएका हुन् ।

प्रहरीले दिएको जानकारी अनुसार तिप्ल्याङका १७ वर्षीय रवि नेपालीले सोही ठाउँका दिलिप नेपालीका छोरा अधिवलाई साथी लिएर कालीगण्डकीमा माछा मार्न पुगेका थिए ।

बालक, मोवाइल र झोलालाई नदी किनारमा राखेर रवि माछा मार्न लागे । रवि करिब १ घण्टापछि फर्किएर आउँदा सो ठाउँमा बालक थिएनन् ।

बालकले लगाएका एउटा मात्र चप्पल र अन्य सामान रहेको तर बालक नभेटिएपछि रविले तत्कालै प्रहरीलाई खबर गरेका थिए ।

प्रहरीले सोमबार दिनभर खोजी गर्दा पनि बालकको अवस्था पत्ता लाग्न नसकेको जिल्ला प्रहरी कार्यालय म्याग्दीले जनाएको छ ।

आज मंगलबार वर्षा भइरहेका कारण खोजी हुन नसकेको प्रहरीले जनाएको छ ।