पोखरा । पोखराको प्रस्याङमा पार्किङमा राखेको ट्रकबाट डिजेल चोरी गर्ने र सस्तो मूल्यमा किन्नेलाई प्रहरीले पक्राउ गरेको छ ।
पक्राउ पर्नेमा पोखरा महानगरपालिका वडा नं. २, फिर्केपुलका १९ वर्षीय रोहित नेपाली र बागलुङ बसपार्कका ४८ वर्षीय जीवन श्रेष्ठ छन् ।
यसअघि पनि पटक पटक तेल चोरीमा संलग्न हुँदै आएका रोहितले सोमबार राति पोखराको प्रस्याङस्थित राधाकृष्ण मार्गमा पार्किङमा राखेको बा०१००६ख३८४० नं. को ट्रकको डिजल ट्यांकीबाट ६० लिटर डिजेल चोरी गरेका थिए ।
साथै उक्त डिजेल ग१ख ७१०२ नम्बरका बसधनी जीवनले जम्मा ४ हजार रुपैयाँमा किनेका थिए ।
उनीहरुबिरुद्ध चोरी तथा डाँकासम्बन्धी मुद्दामा ७ दिनको म्याद थप गरी अनुसन्धान प्रक्रिया बढाइएको कास्की प्रहरीले जनाएको छ ।
