चालक निदाउँदा बससँग ठोक्कियो कार, ७ जनाको घटनास्थलमै मृत्यु

पोखरा । भारतमा सवारी दुर्घटना हुँदा ७ जनाको घटनास्थलमै मृत्यु भएको छ । गएराति करिब १ बजे उत्तर प्रदेशको इटावामा बस र कार ठोक्किएर दुर्घटना भएको भारतीय सञ्चारमाध्यमले जनाएका छन् ।

आगराबाट लखनउ जाँदै गरेको कार र रायबरेलीबाट दिल्ली जाँदै गरेको डबल डेकर बस आपसमा ठोक्किएको आजतकको समाचारमा उल्लेख छ ।

इटावाका एसएसपी कुमार बर्माको भनाइ उद्धृत गर्दै आजतकले कार आफ्नो लेन छाडेर बस आउने लेनतर्फ गएपछि दुर्घटना भएको जनाएको छ ।

दुर्घटनाको प्रकृति हेर्दा कार चालक निदाएका कारण विपरीत लेनमा पुगेको हुन सक्ने एसएसपी बर्मालाई उद्धृत गर्दै आजतकले उल्लेख गरेको छ ।

दुर्घटनामा कारमा सवार तीनै जना र बसमा सवार चार जनाको मृत्य भएको बताइन्छ । कारसँग ठोक्किएपछि बस अनियन्त्रित हुँदै सडक तल खाल्डोमा खसेको थियो ।

बसमा ६० जना सवार रहेको र त्यसमध्ये २५ जना घाइते भएको बिबिसीले जनाएको छ । घाइतेमध्ये एकजनाको अवस्था गम्भीर छ । घाइतेको स्थानीय अस्पतालमा उपचार भइरहेको बताइएको छ ।