महिला भलिबल : नेपाल इरानसँग पराजित

पोखरा । सेन्ट्रल एसियन भलिबल एसोसिएसन (काभा) महिला नेसन्स लिग भलिबल प्रतियोगिताअन्तर्गत आइतबार भएको खेलमा नेपाल इरानसँग पराजित भएको छ ।

प्रतियोगितामा यो नेपालको पहिलो हार हो । यसअघि नेपालले श्रीलङका र भारतलाई पराजित गरेको थियो ।

त्रिपुरेश्वरस्थित राष्ट्रिय खेलकुद परिषद्को कभर्डहलमा भएको खेलमा इरानले नेपाललाई ३-२ ले पराजित गरेको हो । इरानविरुद्धको खेलमा नेपालको सुरुआत भने राम्रो हुन सकेन । नेपाल पहिलो सेटमा इरानसँग १६-२५ ले पराजित भयो । उक्त सेटमा इरानले १६-१० को अग्रता बनाएपछि नेपाल खेलमा फर्कन सकेन ।

दोस्रो सेटमा भने नेपालले उत्कृष्ट सुरुआत गर्दै खेललाई आफ्नो पक्षमा ल्यायो । नेपालले सुरुआतमा ७-० को अग्रता बनाएको थियो । सोही अग्रतालाई जोगाउँदै नेपालले इरानमाथि २५-१६ ले जित्यो र खेललाई १-१ को बराबरीमा ल्यायो ।

खेलको तेस्रो सेटमा नेपाल पुनः पराजित हुन पुग्यो । तेस्रो सेटको सुरूआतमा नेपालले ७-२ को अग्रता बनाएपनि यो अग्रतालाई निरन्तरता दिन सकेन । इरानले ९-९ को बराबरीमा पुर्याएपछि यो सेट निकै प्रतिस्पर्धात्मक बनेको थियो । अन्त्यमा इरानले २५-२३ ले जित्यो ।

खेलको चौथो सेटमा नेपालले सम्यमित प्रदर्शन गर्यो । उक्त सेट नेपालले २५-१५ ले आफ्नो पक्षमा पार्दै खेललाई २–२ को बराबरीमा ल्यायो ।

त्यसपछिको अन्तिम तथा निर्णायक पाँचौ सेटमा भने नेपाल पराजित यो । इरानले पाँचौ सेट १५-१३ ले जित्यो । जितसँगै इरानले ४ खेलबाट ७ अङ्क बनाएको छ भने नेपालको ३ खेलबाट ६ अङ्क छ ।

नेपालले यसअघि नै सेमिफाइनलमा पुगिसकेको छ । नेपालसँगै सेमिफाइनलमा इरान, भारत र श्रीलङ्का पुगेका छन् ।

लिग चरणको अन्तिम खेलमा सोमबार नेपाललले माल्दिभ्ससँग खेल्नेछ । त्यस्तै सोमबार नै हुने अर्को खेलमा श्रीलङ्का र भारतबीच प्रतिस्पर्धा हुने जनाइएको छ ।