गुल्मीमा पहिरोमा पुरिएर एकै परिवारका चार जनाको मृत्यु, दुई जना घाइते

गुल्मी । गुल्मीमा पहिरोमा घर पुरिँदा चार जनाको मृत्यु र दुई जना घाइते भएका छन् ।

मुसिकोट नगरपालिका वडा नं. १ बिसौनामा पहिरोले दुई घर पुरिंदा चार जनाको मृत्यु भएको जिल्ला प्रहरी कार्यालय गुल्मीले जनाएको छ ।

सो घटनामा मृत्यु हुनेमा ४८ वर्षीय गोरे विक, ६७ वर्षीय हुकुम विक, ६६ वर्षीया मसुरी विक र साढे दुई वर्षीया रियन्सा विक छन् । उनीहरु एउटै परिवारका भएको बताइएको छ ।

पहिरोमा पुरिएका मुना विक र बिष्णु विकलाई स्थानीयले उद्धार गरेर उपचारका लागि स्वास्थ्य चौकीमा पठाएका छन् ।

आज बिहान घर माथिबाट खसेको लेदोसहितको पहिरोले बिष्णु विक र हुकुम विकको घर पुरिएको प्रहरीले जनाएको छ ।