पोखराको सिटीवान टेलिभिजनद्वारा तीज गीत प्रतियोगिता आयाेजना

पोखरा । पोखराको सिटीवान टेलिभिजनले यस वर्ष पनि गण्डकी प्रदेश स्तरीय तीजगीत प्रतियोगिता आयोजना गरेको छ । टेलिभिजनको यो प्रतियोगिता तेस्रो हो । ‘तीजको बेला सिटीवानको सांस्कृतिक मेला’ भन्ने नाराका साथ आयोजित प्रतियोगिता भदौ १५ र १६ गते हुनेछ ।

प्रतियोगिता गण्डकी प्रज्ञा प्रतिष्ठानको सभाहलमा हुने टेलिभिजनकी प्रवन्ध निर्देशक अनिषा श्रेष्ठले जानकारी दिइन् । उनका अनुसार प्रतियोगितामा सहभागी हुने टिमलाई निःशुल्क प्रवेश हुनेछ ।

प्रतियोगितामा प्रथम हुने टिमले ५० हजार रुपैयाँ नगद पुरस्कार प्राप्त गर्नेछ । यस्तै, दोस्रो हुनेले ३०, तेस्रोले २० र सान्त्वना स्थान हासिल गर्ने टिमले १० हजार रुपैयाँ नगद पुरस्कार प्राप्त गर्नेछन् ।

यसैगरी उत्कृष्ट नृत्य, उत्कृष्ट भेषभूषा र उत्कृष्ट शब्दलाई पनि नगद पाँच/पाँच हजार रुपैयाँ पुरस्कार प्रदान गरिने टेलिभिजनका ब्रोकास्टिङ म्यानेजर विष्णु गौतमले जानकारी दिए ।

प्रतियोगितामा ५० टिमले सहभागिता जनाउने अपेक्षा गरिएको छ । प्रतियोगितामा सहभागी हुनेका लागि टेलिभिजनको कार्यालय नयाँबजार, गण्डकी प्रज्ञा प्रतिष्ठानको कार्यालय बगर, शुभकामना हार्डवयेर लेखनाथ र बिरौटा हार्डवयेर विरौटाबाट फाराम प्राप्त गर्न सकिनेछ ।

टेलिभिजनले गत वर्ष आयोजना गरेको प्रतियोगितामा पोखरा-१९ को उपकार आमा समूह प्रथम भएको थियो ।