मनसुनी वायुको प्रभाव : आज देशभर वर्षा हुने

पोखरा । देशभर मनसुनी वायुको प्रभाव छ । जल तथा मौसम विज्ञान विभाग मौसम पूर्वानुमान महाशाखाका अनुसार सोमबार पनि मनसुनको न्यूनचापीय रेखा सरदरस्थानमै रहेको छ । जसको प्रभावले गण्डकी प्रदेश राजधानी पोखरामा वर्षा भइरहेको छ ।

अहिले गण्डकी, कोशी र बागमती प्रदेशमा साधारणदेखि आंशिक बदली रही बाँकी भूभागमा आंशिक बदली रहेको छ।

यस्तै बागमती प्रदेशको काभ्रे र मकवानपुरमा हल्का वर्षा भइरहेको छ । आज दिउँसो सबै प्रदेशमा हल्का वर्षा हुने सम्भावना रहेको महाशाखाले जनाएको छ ।

कोशी, बागमती र लुम्बिनी प्रदेशका केही स्थानमा भने भारी वर्षाको सम्भावना रहेको बताइन्छ । दिउँसोको तुलनामा आज राति कम पानी पर्ने सम्भावना छ ।

गण्डकी, कोशी, बागमती र लुम्बनी प्रदेशका थोेरै स्थानमा हल्कादेखि मध्यम वर्षाको सम्भावना छ ।

त्यस्तै गण्डकी, कोशी र बागमती प्रदेशका एक दुई स्थानमा राति पनि भारी वर्षाको सम्भावना रहेको मौसमविद् पुडासैनीले जानकारी दिए ।